وزیراعلیٰ پنجاب سردار عثمان بزدار نے صدر مملکت ڈاکٹر عارف علوی سے ملاقات کی ، جس میں ملکی سیاسی صورتحال سمیت دیگر امور پر تبادلہ خیال کیا گیا۔

گورنر ہاؤس لاہور میں ہونے والی ملاقات میں وزیراعظم کے معاون خصوصی نعیم الحق ، صوبائی وزیر برائے صحت یاسمین راشد اور معاون خصوصی برائے صحت ڈاکٹرظفر مرزا بھی موجود تھے۔

وزیر اعلیٰ پنجاب نے ڈاکٹرعارف علوی کو سانحہ چونیاں کے ملزم کی گرفتاری اور سانحہ چونیاں جیسے واقعات کے تدارک کی حکومتی کوششوں سے آگاہ کیا۔

ملاقات میں عثمان بزدار نے ڈاکٹرعارف علوی کو ڈینگی کے خلاف حکومت پنجاب کے اقدامات پر بریفنگ دی اور صوبےمیں امن و امان کی مجموعی صورتحال اور عوامی فلاح کے منصوبوں کے بارے میں بھی آگاہ کیا۔

اس موقع پر وزیر صحت یاسمین راشد نے بھی پنجاب میں صحت کے منصوبوں سے متعلق تفصیلی بریفنگ دی۔

یاسمین راشد کا کہنا تھا کہ وزیر اعظم کے وژن کے مطابق شعبہ صحت میں آسانیاں پیدا کر رہے ہیں۔ انہوں نے ڈینگی پر قابو پانے کے لیے حکومتی اقدامات سے بھی آگاہ کیا۔

واضح رہے اس سے قبل وزیراعلیٰ پنجاب عثمان بزدار نے پریس کانفرنس کرتے ہوئے کہا کہ چونیاں کو سیف سٹی اتھارٹی کے ساتھ منسلک کیا جائے گا۔

وزیر اعلیٰ پنجاب نے کہا تھا کہ چونیاں واقعے میں ملوث ملزم گرفتار کرلیا گیا ہے، حال ہی میں چاروں وارداتیں سہیل شہزاد نامی ملزم نے کیں ہیں، متعلقہ اداروں نے بہت محنت کی ہے جس پران کاشکرگزارہوں۔

اس کامیابی پر وزیراعظم عمران خان کا وزیراعلیٰ پنجاب عثمان بزدار کو ٹیلی فون کیا جس میں وزیراعظم نےسانحہ چونیاں کاملزم پکڑےجانےپروزیراعلیٰ اورآئی جی پنجاب کومبارکباددی۔