مسلم لیگ ن کے رہنما رانا ثنا اللہ کا کہنا ہے کہ حکومت سیاسی انتقام لے رہی ہے،میرے تمام اثاثے اور اکاؤنٹس منجمد کر دیئے گئے ہیں تا کہ میں وکلا کو فیس نہ دے سکوں۔

تفصیلات کے مطا بق  مسلم  لیگ ن کے رہنما رانا ثنا اللہ نے لاہور میں انسدادمنشیات عدالت کے باہر میڈیا سے گفتگو کرتے ہوئے کہا کہ حکومت اپنی مرضی کے جج لگانا چاہ رہی ہے، ایک ماہ ہو گیا ہے ابھی تک کسی جج کو مقرر نہیں کیا گیا، انہوں نے الزام لگایا کہ حکومت سیاسی انتقام لے رہی ہے، میرے تمام اثاثے اور اکاؤنٹس کو منجمد کر دیا گیاہے۔

ان کا کہنا ہے کہ  اکاؤنٹس منجمد کرنے کا مقصد  یہ ہے کہ میں اپنے وکلا کو فیس نہ دے سکوں،میرا بطور ایم این اے تنخواہ کا اکاؤنٹ بھی بند کر دیا گیا ہے، اس حکومت کو زیادہ وقت دینا ملک کے لیئے انتہائی نقصان دہ ثابت ہو گا۔

انہوں نے یہ بھی کہا کہ ڈیوٹی جج روزمرہ کے معاملات سن رہا ہے جبکہ حکومت اپوزیشن کو ٹارگٹ کرنے میں الجھی ہوئی ہے،

دوسری جانب رانا ثنا اللہ کے منشیات کیس کی سماعت اسپیشل جج سینٹرل خالد بشیر سماعت کر رہے ہیں جبکہ دورانِ سماعت رانا ثناء اللّٰہ کی جانب سے ایڈووکیٹ فرہاد علی شاہ نے دلائل دیے۔

رانا ثناء اللّٰہ کی پیشی کے موقع پر عدالت کے چاروں اطراف سیکیورٹی کے سخت انتظامات کیے گئے تھےتاہم رانا ثناء اللّٰہ کی اہلیہ بھی انسدادِ منشیات کی عدالت میں موجود ہیں۔

.واضح رہے کہ مسلم لیگ ن کے رہنما رانا ثناء اللّٰہ کو منشیات برآمدگی کے الزام میں گرفتار کیا گیا تھا