امیرجماعت اسلامی سراج الحق نے کہا ہے کہ موجودہ حکومت کی بیماریاں دن با دن بڑھتی جارہی ہیں،حکومت تشویشناک حالت کی بنا پروینٹی لیٹرپرجاسکتی ہے۔

تفصیلات کے مطابق امیر جماعت اسلامی سراج الحق نے اپنے ایک بیان میں کہا کہ موجودہ حکومت میں وزراء اور حکومتی ڈاکٹرز قوم کے ساتھ مسلسل مذاق کررہے ہیں۔

سراج الحق کا کہنا تھا کہ حکمران احتساب کے لیے تیار رہیں  کیونکہ کشمیر سے بے وفائی کرنے والوں کا قوم محاسبہ کرے گی۔

سراج الحق کا یہ بھی کہنا تھا کہ حکمران کشمیری ماﺅں، بہنوں ،بیٹیوں کی پکار پر صم بکم عمی بنے ہوئے ہیں اور 22 دسمبر کو کشمیریوں سے اظہار یکجہتی کے لیے کشمیر مارچ کیا جائے گا۔

اپنے بیان میں امیرجماعت اسلامی سراج الحق کا مزید کہنا تھا کہ قوم کشمیریوں کو تنہا نہیں چھوڑے گی جبکہ ملک بھرسے لاکھوں کی تعداد میں لوگ اسلام آباد پہنچیں گے۔

واضح رہے کہ اس سے قبل لاہور میں میڈیا سے بات کرتے ہوئے امیر جماعت اسلامی سراج الحق نے کہا تھا کہ بائیس دسمبر کو اسلام آباد کی طرف کشمیر مارچ کریں گے۔

امیر جماعت اسلامی سراج الحق نے کہا تھا کہ اسلام آباد جا کر حکمرانوں کو جگانے کی کوشش کروں گا، پنجاب کے ہر ضلع، ہر علاقے سے قافلے روانہ ہوں، جماعت اسلامی کے کارکنان بائیس دسمبر کے لیے تیاری کر لیں، کشمیر کی آزادی کے لیے خون کا آخری قطرہ بھی بہا دیں گے۔

 سراج الحق نے یہ بھی کہا تھا کہ کشمیر کی آزادی کے لیے خون کا آخری قطرہ بھی بہا دیں گے، سنگ مرمر کے قبرستان اسلام آباد میں جا کر جہاد کا اعلان کریں گے۔

امیر جماعت اسلامی پاکستان کا کہنا تھا کہ انگریزوں نے ہمارے کلچر کو بھی تباہ کیا، حکومتیں جھوٹ بولتی رہیں کہ تعلیم عام کریں گے، شرم کی بات ہے پاکستان میں تعلیم کے لیے کم بجٹ رکھا جاتا ہے، آیندہ بلدیاتی الیکشن میں نوجوانوں کو دیکھنا چاہتے ہیں۔

امیر جماعت اسلامی سراج الحق کا مزید کہنا تھا کہ موجودہ حکومت کا ویژن کارخانوں کی بہ جائے لنگر خانوں پر ہے، حکومت کی معاشی پالیسیوں کے نتیجے میں ٹماٹر مہنگا ہوا۔