مسلم لیگ ن کےرہنما نےکہا ہے کہ سرورِ کونین حضرت محمد مصطفیٰ ﷺ پوری انسانیت کے لیے رحمت بنا کر بھیجے گئے۔

تفصیلات کے مطا بق صدر اور قومی اسمبلی میں قائدِ حزبِ اختلاف شہبا ز شریف نے ایک بیان میں عید میلاد النبی ﷺ کے موقع پر قوم کو مبارکباد پیش کرتے ہوئے کہا کہ آقا کریم ﷺ کا پیغام ابدی ہدایت اور کامیابی کی کلید ہے۔

ذرائع کے مطا بق شہبا ز شریف نے کہا کہ قرآنِ حکیم اور سیرتِ طیبہ ﷺ کو تھام کر دنیا اور آخرت میں کامیابی حاصل کر سکتے ہیں، آج کا دن سسکتی، تڑپتی اور جہالت میں ٹھوکریں کھاتی انسانیت کے لیے نجات اور فلاح کا دن ہے۔

لیگی رہنما نے کہا کہ قرآن کریم کے پیغام کو آپ ﷺ کی سیرتِ پاک کی روشنی میں نافذ کرنا ہی ہمارا مشن ہے،پاکستان کو بھی آپ ﷺ کی سیرت پاک اور آپ ﷺ کے لائے ہوئے نظام کا مکمل گہوارہ بننا ہے۔

وا ضح رہے کہ وزیراعظم عمران خان نے اپنے پیغام میں عید میلاد النبیﷺ کے موقع پر پوری قوم کو مبارکباد دی اور ملک میں محبت، امن اور ہم آہنگی کی فضا پیدا کرنے کے لیے محسن انسانیت حضرت محمد ﷺ کی سیرت طیبہ پرعمل کی اہمیت واضح کی۔

آج دنیا بھر میں اللہ کے نبیﷺ کی ولادت پر جشن کا سماں ہے، عاشقان رسول اپنی محبت اور عقیدت کا اظہار کررہے ہیں۔

لاہور میں پاک فوج کے چاق وچوبند دستے نے اکیس توپوں کی سلامی دی، فضائیں اللہ اکبر کے فلک شگاف نعروں سے گونج اٹھیں، ملک بھر کی مساجد میں نماز فجر کے بعد پاکستان میں امن و سلامتی کے لیے خصوصی دعائیں کی گئیں۔