جمعیت علماء اسلام (ف) کے سربراہ مولانا فضل الرحمان نے کہا ہے کہ حکومت نے ملک کو معاشی طور پر تباہ کرکے رکھ دیا ہے، اگر اگلا بجٹ بھی نااہلوں نے پیش کیا تو خدا نخواستہ پاکستان بیٹھ جائے گا۔

تفصیلات کے مطابق اسلام آباد میں آزادی مارچ کے شرکاء سے خطاب کرتے ہوئے جمعیت علماء اسلام (ف) کے سربراہ مولانا فضل الرحمان نے کہا کہ پاکستان مالی بحران سے گزررہا ہے اورہم ایسی آئینی حکومت چاہتے ہیں جو آئین پاکستان کی عکاسی کرتی ہو۔

مولانا فضل الرحمان نے کہا کہ ہم ملک میں صرف انصاف دیکھنا چاہتے ہیں جبکہ اس حکومت نے لاکھوں لوگوں کو بیروزگار کر دیا ہے، سلیکٹیڈ حکومت نے نوکریاں دینے کا جھوٹ ووٹ لینے کے لیے بولا تھا۔

جمعیت علماء اسلام (ف) کے سربراہ نے یہ بھی کہا کہ حکومت کی پالیسیوں میں تضاد ہے،ایک طرف کشمیرکی بات کرتےہیں اور دوسری طرف کرتارپورکے راستے بھارت سے پینگیں بڑھا رہے ہیں۔

جلسے سے خطاب کرتے ہوئے مولانا فضل الرحمان کا کہنا تھا کہ ہم اس حکومت کو ایک دن بھی دینے کو تیار نہیں کیونکہ پوری قوم اس حکومت پر شرمندہ ہے اور ہم مزید بحران کی طرف نہیں جانا چاہتے اسلئے حکومت کو گھر بھیج کر رہیں گے۔

مولانا فضل الرحمان کا یہ بھی کہنا تھا کہ حج مہنگا ہوگیا اور سکھوں کیلئے پاکستان کی زیارت مفت ہوگئی یہ باتیں آصف زرداری نے کی تھیں توانہیں ملک دشمن کہا گیا تھا۔

جمعیت علماء اسلام (ف) کے سربراہ مولانا فضل الرحمان کا مزید کہنا تھا کہ افغانستان میں پاکستانی سفارتکاروں کوہراساں کرنے پر وزارت خارجہ خاموش ہے، موجودہ حکومت ایسے واقعات پراحتجاج تک نہیں کررہی، ملک مزید نقصان برداشت کرنے کا متحمل نہیں۔