شہر قائد میں جاری اسٹریٹ کرائم کی لہر میں ایک اور ننھی جان چلی گئی۔

تفصیلات کے مطابق  کراچی کے علاقے سرجانی گلشن کنیز فاطمہ سوسائٹی میں ڈکیتی مزاحمت پر فائرنگ سے 4 سالہ بچی جاں بحق ہوگئی۔

پولیس کے مطابق چار سالہ بچی سدرہ ڈکیتی مزاحمت کے دوران سر پر گولی لگنے سے زخمی ہوئی تھی  جسے فوری طور پر عباسی شہید اسپتال منتقل کیا گیا تھا تاہم وہ جانبر نہ ہوسکی۔

جاں بحق ہونے والی بچی کے والد  نےعباسی شہید اسپتال کے باہر  میڈیا سے گفتگوکرتے ہوئے بتایا کہ  بچی ماموں کے ساتھ چیز لینے گئی تھی،موٹر سائیکل نہ رکنے پر ڈاکوؤں نےفائرنگ کی جس سے  دونوں کو گولیاں لگیں۔

ایس ایس پی ویسٹ کا کہنا ہے کہ ابتدائی رپورٹ کے مطابق فائرنگ کا واقعہ ڈکیتی کے دوران مزاحمت پر پیش آیا، شبہ ہے کہ موٹر سائیکل چھیننے کے دوران ملزموں نے فائرنگ کی۔

انہوں نے مزید کہا کہ زخمی نوجوان کا بیان قلمبند ہونے کے بعد حقائق واضح ہوں گے۔

دوسری جانب آئی جی سندھ ڈاکٹرسید کلیم امام نے  واقعے کا نوٹس لے کر ایس ایس پی ویسٹ سے فوری طور پر تفصیلات طلب کرلی ہیں۔

انہوں نے کہا کہ واقعہ میں ملوث ملزمان کی گرفتاری کے لیےضلعی سطح پر انتہائی مستعد اورمتحرک اقدامات اٹھائے جائیں اور اس ضمن میں دیگر تمام اضلاع سے بھی مربوط روابط کو یقینی بنایا جائے۔

واضح رہے کہ سندھ پولیس   اور دیگر قانون نافذ کرنے والے اداروں کی جانب سے شہر قائد میں اسٹریٹ کرائم کی روک تھام کے لیے کیے جانے والے متعدد اقدامات بھی اہم نتائج دینے میں ناکام رہے ہیں۔

کراچی  میں رواں برس ڈکیتی کی مختلف وارداتوں کے دوران 330افراد زخمی  جبکہ 40 افراد جاں بحق  ہوچکے ہیں۔

یاد رہے کہ رواں برس میں اس سے قبل لانڈھی میں ڈکیتی کے دوران پاک فوج  کا جوان ، بلدیہ میں رینجرز اہلکار اور گلشن اقبال میں مصباح نامی میڈیکل کی طالبہ  بھی قتل ہوچکی ہے۔