گورنر اسٹیٹ بینک ڈاکٹر رضا باقر کی وزارت خارجہ میں وزیر خارجہ مخدوم شاہ محمود قریشی سے ملاقات ہوئی۔

اس موقع پر گورنر اسٹیٹ بینک نے ملاقات میں وزیر خارجہ سے ملک کی مجموعی اقتصادی صورتحال سمیت دیگر اہم امور پر تبادلہ خیال کیا جبکہ رضا باقر نے سٹیٹ بینک، زرمبادلہ کی موجودہ  شرح  اور دیگر مالیاتی اشاریوں کے حوالے سے وزیر خارجہ کو بریفنگ دی۔

وزیر خارجہ مخدوم شاہ محمود قریشی نے کہا کہ پاکستان میں کاروبار کرنے کیلئے میسر وسیع مواقعوں کی طرف دنیا کی توجہ مبذول کروانے اور بیرونی سرمایہ کاروں،بین الاقوامی کمپنیوں کو تمام ممکنہ سہولیات کی فراہمی کیلئے “معاشی سفارتکاری” کو بروئے کار لا رہے ہیں۔

وزیر خارجہ کا کہنا تھا کہ معاشی سفارت کاری کے مثبت نتائج تواتر کے ساتھ سامنے آرہے ہیں۔

شاہ محمود قریشی کا یہ بھی کہنا تھا کہ بین الاقوامی ادارے پاکستان کی معاشی صورت حال میں بہتری کی نوید سنا رہے ہیں۔

وزیر خارجہ مخدوم شاہ محمود قریشی کا مزید کہنا تھا کہ حکومتی پالیسوں پر مثبت ردعمل بین الاقوامی سطح پر سامنے آناخوش آئند ہے۔

دوسری جانب ثقافتی سفارتکاری کو عملی جامہ پہنانے کیلئے وزیر خارجہ مخدوم شاہ محمود قریشی کی وزارت خارجہ میں خیبر پختون خوا کے سینئر وزیر برائے سیاحت وثقافت عاطف خان کے ساتھ تفصیلی ملاقات ہوئی۔

  ملاقات میں پاکستانی کلچر کی طرف دنیا بھر کی توجہ مبذول کروانے کیلئے سیاحت کے فروغ،  سمیت دیگر اہم امور پر تفصیلی تبادلہ خیال جبکہ عاطف خان نے وزیر خارجہ کو خیبر پختون خواہ میں سیاحت کے فروغ کے لئے کئے گئے اقدامات سے آگاہ بھی کیا۔

وزیر خارجہ نے سینیٹر صوبائی وزیر عاطف خان کی خیبر پختون خواہ میں سیاحت اور ثقافت کے فروغ کیلئے کی جانے والی کاوشوں کو سراہا۔

اس موقع پر وزیر خارجہ مخدوم شاہ محمود قریشی کا سفارت کاری کے فروغ کیلئے ایک اور اہم اقدام اٹھاتے ہوئے وزیر اعظم عمران خان کی خصوصی ہدایت پر، کامیاب اقتصادی سفارتکاری  کے بعد ثقافتی سفارت کاری کے آغاز کا اعلان کردیا۔

۔ پاکستان سیاحت کے اعتبار سے انتہائی اہم ملک بن چکا ہے جہاں پر سیاحت کے بے پناہ مواقع موجود ہیں

ہم وزیر اعظم عمران خان کی ہدایت پر غیر ملکی سیاحوں کے لئے آن لائن ویزہ کی سہولت فراہم کر رہے ہیں تاکہ سیاح آسانی کے ساتھ پاکستان آ سکیں اور پاکستان کے تاریخی، ثقافتی ورثے سے مستفید ہو سکیں۔

پاکستان کو ترقی یافتہ ممالک کی صف میں لانے کیلئے ثقافت اور سیاحت کے فروغ کیلئے مزید موثر اقدامات کرنا ہوں گے۔