وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ لیگی ترجمانوں کو اپنے قائد کے پلیٹلیٹس کی بجائے سیاست کی فکر پڑ گئی ہے۔

تفصیلات کے مطابق سماجی رابطے کی ویب سائٹ ٹوئٹر وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے اپنے ایک ٹوئٹ لیگی ترجمانوں کو مخاطب کرتے ہوئے کہا کہ آپ پاکستان کے مقبول رہنما اور منتخب وزیراعظم پر تنقید کر کے اپنا قد اونچا کرنے کی کوشش کر رہے ہیں، آج ظل سبحانی کی صحت سے متعلق دعا کی اپیل کیوں نہیں کی؟

لیگی ترجمانوں کو اپنے قائد کے پلیٹلیٹس کی بجائے سیاست کی فکر پڑ گئی ہے۔آج ظل سبحانی کی صحت سے متعلق دعا کی اپیل کیوں نہیں کی؟آپ پاکستان کے مقبول رہنما اور منتخب وزیراعظم پر تنقید کر کے اپنا قد اونچا کرنے کی کوشش کر رہے ہیں.

— Dr. Firdous Ashiq Awan (@Dr_FirdousPTI) November 29, 2019

اپنے پیغام میں ڈاکٹرفردوس عاشق اعوان کا کہنا تھا کہ ہاں آپ نے ٹھیک کہا وزیراعظم عمران خان کرپشن کے فارمولوں سے آگاہ نہیں ہیں اور نہ ہی اپنے رفقاء کے ذاتی کاروبار کو تحفظ دیتے ہیں۔

 ڈاکٹر فردوس عاشق اعوان کا یہ بھی کہنا تھا کہ جنرل جیلانی کے سائے میں پروان چڑھنے والے منتحب وزیراعظم کے حوالے سے بغض پر مبنی بیانات داغ رہے ہیں۔

وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان کا مزید کہنا تھا کہ عمران خان ہر محاذ پر شاطرانہ چالوں کا مقابلہ کر رہے ہیں اور کرتے رہیں گے۔

واضح رہے اس سے قبل معاون خصوصی فردوس عاشق اعوان نے جدہ میں میڈیا سے گفتگو کرتے ہوئے کہا تھا کہ ذرائع ابلاغ کے حوالے سے سال 2020 پاک سعودی تعلقات کو مضبوط اور مؤثر بنانے کے حوالے سے انتہائی اہم ثابت ہو گا۔

ان کا کہنا تھا کہ پاکستان اور سعودی عرب کے درمیان میڈیا تعلقات پر بات چیت چل رہی ہے اور امید ہے کہ پریس ایجنسی اور سعودی پریس ایجنسی کے درمیان بہت جلد معاہدہ طے پائے گا جس کے بعد پاکستانی ڈراموں اور فلموں کو بھی سعودی عرب کے ٹی وی چینلز اور سینماؤں میں دکھایا جائے گا۔

انہوں نے یہ بھی کہا کہ کسی بھی تھرڈ پروسیس کو حقیقت میں تبدیل کرنے کے لیے لانگ ٹرم روڈ میپ اور طریقہ کار کی ضرورت ہوتی ہے اور امید کرتی ہوں کہ اپنے اگلے دورے میں ان تمام چیزوں پر  عملدرآمد کیلئے ایک مخصوص لائحۂ عمل تیار کر سکیں گےجس میں او آئی سی کے سیکرٹری جنرل سمیت تمام ممبر ممالک کو آن بورڈ آنا ہو گا۔