کرتارپورراہداری سکھ یاتریوں کیلئے کھول دی گئی،وزیراعظم عمران خان آج کرتارپورراہداری کا افتتاح کریں گےجس  کیلئے وہ سیالکوٹ سےوہاں پہنچے ہیں۔

تفصیلات کے مطابق کرتارپور راہداری کے افتتاح کیلئے تیاریاں مکمل کر لی گئی ہے۔وزیراعظم عمران خان نے گزشتہ سال 28نومبرکوکرتارپوررہداری کاسنگ بنیادرکھاتھا۔

وزیراعظم عمران خان کی ہدایت پرحکومتِ پاکستان نے 11 ماہ کی ریکارڈ مدت میں کرتارپورراہداری مکمل کی اورگوردوارہ دربارصاحب کودنیا کا سب سے بڑا گوردوارہ بنادیا۔

بھارت کی جانب سےکرتارپوررہداری کےافتتاح کے موقع پرسابق وزیراعظم من موہن سنگھ اورسیاسی و سماجی رہنما نوجوت سنگھ سدھوکی شمولیت متوقع ہے۔ افتتاحی تقریب کیلئےدعوت نامے سفارتکاروں اور دیگر اہم شخصیات کو بھجوائے گئے ہیں۔

معززین کے لیے ساٹھ  فٹ لمبا اورچوبیس فٹ چوڑا اسٹیج تیارکرلیاگیا۔ ہے جب کہ شرکا کے لیے پنڈال میں چھ ہزار کرسیاں، ساونڈ سسٹم اور اسکرینیں لگائی گئی ہیں۔ بارش کے پیش نظر پنڈال کو واٹر پروف بنایا گیا ہے۔

بابا گرونانک کے550 ویں جنم دن میں شرکت کےلیے مختلف ممالک میں پاکستانی سفارتخانوں نے سکھ  یاتریوں کو ویزے بھی جاری کر دیئے ہیں۔

ترجمان دفتر خارجہ کے مطابق مختلف ممالک سے پانچ ہزار سکھ یاتریوں کو ویزے جارے کیے گئے جب کہ پاکستان آنے والے سکھوں کی مجموعی تعداد 10 ہزار تک جا سکتی ہے۔

ڈیرہ بابانانک راہداری سےمتعلق پہلی بارانیس سو اٹھانوے میں بھارت اور پاکستان کےدرمیان مشاورت کی گئی تھی اوراس کامعاہدہ چوبیس اکتوبر2019 کو ہواتھا۔

گوردوارہ دربار صاحب بین الاقوامی سرحد زیرو پوائنٹ سے ساڑھے 4 کلومیٹر کے فیصلے پر پاکستان میں واقع ہے۔

مذکورہ منصوبہ 823 ایکڑ اراضی پر پھیلا ہوا ہے اور تین سو تیس ایکڑرقبے پر یاتریوں کے قیام کیلئے کمپلیکس بنایا گیا ہے۔ تیرہ اعشاریہ پانچ ایکڑ رقبے پر بارڈر ٹرمینل امیگریشن کی عمارت بنائی گئی ہے۔

راہداری منصوبے میں 6.8 کلومیٹر سڑکیں، دریائے راوی پر 800 میٹرپل اور دریائے راوی پر 2.8 کلومیٹر پر سیلاب سے بچاؤ کیلئے بند بنائے گئے ہیں۔

پاکستان دوسرے مرحلے میں بڈھی راوی کریک زیرو پوائنٹ پر 262 میٹر پل بھی تعمیر کرےگا۔ گوردوارہ کے گرد ایک لاکھ 52 ہزار مربع فٹ بارہ دری بھی تعمیر کی گئی۔

بارہ دری میں درشن ڈیوڑی، دیوان استھان، میوزیم، لائبریری اور 500 یاتریوں کیلئے 20 رہائشی احاطے شامل ہیں۔ بابا گرونانک سے منسوب آم کے درخت، کھوئی صاحب سمیت تمام اشیاء کو محفوظ کر دیا گیا۔

گرو دوارے میں 28 ہزار 190 مربع فٹ لنگر خانہ 2 ہزار لوگوں کو بیک وقت خدمات پیش کرے گا۔

دربار صاحب گرودوارہ کا بھارتی سرحد سے فاصلہ تین سے چار کلومیٹر ہے لیکن سکھ یاتریوں کو لاہور سے اس گرودوارے تک پہنچنے 130 کلومیٹر کا سفر طے کرنا پڑتا ہے اور تقریباً تین گھنٹوں کا وقت لگ جاتا ہے۔

پاکستان کےضلع ناروال کی تحصیل شکرگڑھ میں کرتارپوروہ مقام ہے جہاں سکھوں کے پہلے گرو نانک دیو جی نے اپنی زندگی کے آخری ایام گزارے تھے۔یہاں ان کی ایک سمادھی بھی ہے جو سکھوں کے لیے ایک مقدس مقام کی حیثیت رکھتے ہیں۔

وزیراعظم عمران خان کا پیغام

کرتارپور پور راہداری کے افتتاح سے پہلےوزیراعظم عمران خان نے قوم کوپیغام دیتےہوئے کہاہے کہ آج ہم صرف راہداری نہیں سکھ کمیونٹی کے لیے اپنے دل بھی کھول رہے ہیں۔ قائداعظم محمد علی جناح کا نظریہ بھی یہی تھا۔

وزیراعظم نےمزید کہاکہ تمام متعلقہ لوگوں کوبھی مبارکباددی جاتی ہے جنہوں نے 10 ماہ کے وقت میں ویژن کو حقیقت میں تبدیل کیا۔