مسلم لیگ ن کے رہنما خواجہ آصف کا کہنا ہے کہ مارچ کو وقت کا ضیاع کہا جا رہا ہے، یہ لوگ نیازی صاحب کو گالیاں پڑواتے ہیں، یہ ان کے دوست نہیں دشمن ہیں۔

تفصیلات کے مطابق قومی اسمبلی میں خطاب کرتے ہوئے خواجہ آصف نے کہا کہ آپ لوگ ماضی میں الیکشن کا مطالبہ کرتے تھے، ہم کر رہے ہیں تو کیا مسئلہ ہے؟ان کو نہیں پتہ ، جب ان کے سر پر چھت گرے گی تو ان کو پتہ چلے گا، جو اقتدار میں ہوتا ہے سب سے زیادہ کم علم ہوتا ہے، جمہوریت کے بغیر وفاق قائم نہیں رہ سکتا، 12 آرڈیننس بغیر بحث کے اس ایوان سے منظور ہوئے۔

خواجہ آصف نے کہا کہ جس طرح ایوان میں قانون سازی ہوئی، سارا ایوان شرمسار ہوا، اس ایوان کے لیے کل کوئی اچھا شگون نہیں تھا، ان کو احساس نہیں ہے، اس طرح جمہوریت کا بیڑا غرق ہوگا۔

مسلم لیگ ن کے رہنما نے کہا کہ خٹک صاحب! آپ کنٹینر پر چڑھ کر ڈانس کرتے تھے، اس طرح کے رویے رہے تو دور نہیں کہ سارا نظام لپیٹ دیا جائے گا، اگرآپ مذاکرات میں کوئی کردار ادا کر سکتے ہیں تو جمہوریت کے لیے کردار ادا کرنا چاہیے۔

انھوں نے کہا کہ چوہدری پرویز الٰہی نے کہا کہ مذاکراتی کمیٹی میں اتنی ہمت نہیں کہ اصل بات وزیرِ اعظم تک پہنچائے،ہم اللہ تعالیٰ اور ایوان کو جوابدہ ہیں، اگر میں کوئی قابلِ اعتراض بات کروں تو اسپیکر صاحب! آپ ٹوک دیجئے گا۔

خواجہ آصف نے مزید کہا کہ میرے قائد کو عہدے سے ہٹایا گیا، میرا قائد ضمانت پر ہے، آج ان کا قائد پکڑا گیا، انہوں نے ہندوستانیوں سے پیسے لیے، ان کو احساس نہیں، ایسے جمہوریت کا بیڑا غرق ہوگا ۔