آزادی مارچ کے دوسرے مرحلے کے حوالے سے اہم اجلاس ہوا، جس میں مرکزی مجلس عاملہ،صوبائی اور ضلعی قیادت نے شرکت کی۔

اجلاس میں آزادی مارچ کو ملک بھر میں پھیلانے پر مشاورت کی گئی جبکہ آزادی مارچ کے پلان بی پر بھی تفصیلی بات چیت کی گئی

ذرائع کا کہنا تھا کہ اجلاس میں اسلام آباد میں آزادی مارچ جاری رکھنے کا فیصلہ کیا گیا اور جے یو آئی ف کے صوبائی امراء نے بھی مشاورت کیلئے وقت مانگ لیا۔

ذرائع کا مزید کہنا تھا کہ حکومت کے ساتھ مذاکرات جاری رکھنے یا نہ رکھنے کا فیصلہ نہیں ہوسکا اسلئے اجلاس کل بھی ہوگا جس میں حتمی مشاورت کی جائے گی۔

واضح رہے کہ اس سے قبل بھی مولانا فضل الرحمان اور محمود خان اچکزئی کے درمیان ملاقات ہوئی تھی۔

جمعیت علمائے اسلام (ف) کے سربراہ مولانا فضل الرحمان اور پختونخوا ملی عوامی پارٹی کے رہنما محمود خان اچکزئی کے درمیان ہو نے والی اس ملاقات میں سینیٹر عثمان کاکڑ اور پی کے میپ کے دیگر رہنما مو جود تھے۔

اس کے علاوہ اکرم درانی، عبدالغفور حیدری سمیت جے یو آئی قیادت بھی ملاقات میں شریک تھے۔

ذرائع کا کہنا تھا کہ مولانا فضل الرحمان کی دیگر اپوزیشن جماعتوں سے مشاورت کی گئی جبکہ اس کے علاوہ ملاقات میں پی ایم ڈی سی کے مسائل پربھی تبادلہ خیال کیا گیا۔