پاکستان پیپلزپارٹی کےسینئررہنماخورشیدشاہ کوآمدن سےزائد اثاثہ جات کیس میں

 جوڈیشل ریمانڈمکمل ہونے پراحتساب عدالت میں پیش کردیاگیا۔

تفصیلات کے مطابق سینیئرپیپلز پارٹی رہنماآمدن سے زائد اثاثہ جات کیس میں گرفتار ہیں۔ خورشید شاہ کوسکھر کی احتساب عدالت میں جوڈیشل ریمانڈ مکمل ہونے پر پیش کیاگیا۔

سینئر پیپلز پارٹی لیڈرکواین آئی سی وی ڈی سے ایمبولینس کے ذریعے لایا گیا، خورشید شاہ طبعیت خرابی کے باعث این آئی سی وی ڈی میں زیر علاج ہیں۔

خورشید شاہ کی پیشی کے موقع پرصوبائی وزیر ٹرانسپورٹ سید اویس شاہ،ایم پی اے سید فرخ شاہ سمیت دیگر پی پی رہنما عدالت میں موجودہیں، نیب کی جانب سے خورشید شاہ سے تفتیش کی پروگریس رپورٹ پیش کی جائے گی،احتساب عدالت میں خورشید شاہ کی میڈیکل رپورٹ بھی پیش کی جائے گی۔

گزشتہ سماعت کے دوران نیب پراسیکیوٹرنےعدالت کو بتایا تھا کہ خورشید شاہ نیب سے تعاون نہیں کر رہے ہیں۔ انہوں نےکہاتھاکہ نیب  پیپلز پارٹی رہنماسے مزید تحقیقات کرنا چاہتا ہےجس کیلئےمزید 15 دن کا جسمانی ریمانڈ درکارہے۔

نیب پراسیکیوٹرکاکہناتھاکہ خورشید شاہ کاریمانڈ اب تک ملا تھاکیونکہ آدھا وقت تو اسپتال میں گزر گیاتھا، تاہم عدالت نے نیب پراسیکیوٹر کی استدعا مسترد کر دی تھی۔

خورشید شاہ کو نیب 58 دن تک پہلے ہی ریمانڈ پر رکھ چکی ہےتاہم ابھی تک ان کے خلاف کوئی ٹھوس ثبوت عدالت میں پیش نہیں کرسکی۔

واضح رہے کہ 31 جولائی کو قومی احتساب بیورو (نیب) کے چیئرمین جسٹس (ر) جاوید اقبال کی سربراہی میں ہونے والے ایگزیکٹو بورڈ کے اجلاس میں سید خورشید شاہ کے خلاف انکوائری کی منظوری دی گئی تھی، جس کے بعد 18 ستمبر کو نیب سکھر اور راولپنڈی نے مشترکہ کارروائی میں آمدن سے زائد اثاثہ جات کیس میں خورشید شاہ کو گرفتار کیا تھا۔