کراچی کے علاقے گلستان جوہر میں تجاوزرات کے خلاف آپریشن کرنے  کے لئے پہنچنے والی نفری کو دیکھ کر علاقہ مکین مشتعل ہوگئے۔ علاقہ مکینوں نے سڑک کو بند کردیا ،سڑک پر لکڑیاں رکھ کر آگ لگا دی ۔  کے ڈی اے کی جانب سے تجاوزرات کے خلاف آپریشن کیا جانا تھا ۔ مشتعل  افراد کے احتجاج کے باعث شدید ٹریفک جام ہو گیا اور گاڑیوں کی لمبی قطاریں لگ گئی۔

یاد رہے کہ اس سے قبل سینئر ڈائریکٹر لینڈ اینٹی اینکروچمنٹ بشیر صدیقی کی زیر نگرانی ڈسٹرکٹ ساوتھ نے نشتر روڈ گارڈن میں تجاوزات کے خلاف  آپریشن شروع کیا تھا۔

آپریشن میں تمام دوکانوں کے آگے بڑھائے گئے چبوترے دیواریں گرل مسمار کردئیے گئےجبکہ کھانے پینے کے اسٹال ریڑھیاں تخت کرسیاں میزیں پنجرے پتھارے کیبن پنکچر لگانے والوں کا سامان ضبط کر لئے گئے تھے ۔

واضح رہے اس سے قبل بھی کراچی میں تجاوزات کے خلاف آپریشن کے دوران سپریم کورٹ کے احکامات پر کے ایم سی کی متعدد علاقوں میں کارروائی کی گئی تھی۔

کراچی کے ایم سی کے انسداد تجاوزات عملے کی جانب سے ڈسٹرکٹ ساوتھ کاروائی میں لائٹ ہاوس، کھارادر، زینب مارکیٹ، لانڈھی، صدر اور ریگل چوک کے اطراف کے حصے شامل تھے۔

کاروائی کے دوران لائٹ ہاوس نالے کے اطراف غیر قانونی دکانیں اور جھونپڑیاں مسمار کردی گئیں جن کی تعداد 280 تھی۔ لائٹ ہاوس میں مزید کاروائی کرتے ہوئے لیڈی ڈیفرین ہسپتال کی دیوار کے ساتھ قائم 70 دکانیں بھی مسمار کی گئیں جبکہ کھارادر میں کاروائی کرتے ہوئے بخاری مسجد کے قریب فٹ پاتھ پر قائم کمرا مسمار کردیا گیا تھا۔