جمیعت علمائے اسلام کے سربراہ مولانا فضل الرحمان اور حکومت کے اتحادی پرویزالہیٰ کی ملاقات شروع ہوگئی ہے۔

تفصیلات کے مطابق ان دونو ں رہنما وں کی اس ملاقات میں آزادی مارچ اور حکومت کے ساتھ مذاکرات سے متعلق تبادلہ خیال اورحکمت عملی پر غور کیا جائے گا۔

ذرائع کے مطا بق آزادی مارچ کے حوالے سے مولانا فضل الرحمان اور پرویز الہی کےدرمیان 48 گھنٹوں میں چوتھی ملاقات ہو رہی ہے، پرویز الہی اور مولانا فضل الرحمان درمیانی راستہ نکالنے پر بات چیت کریں گے،پرویز الہی مولانا کو اعلی سطحی پارلیمانی کمیشن پر قائل کرنے کی کوشش کریں گے۔

واضح رہے کہ جمیعت علمائے اسلام کا آزادی مارچ کراچی سے شروع ہوا اور 31 اکتوبر کو اسلام آباد میں داخل ہوا جنھیں سیکٹر ایچ 9 میں کشمیر ہائی وے پر بیٹھنے کی جگہ دی گئی ۔

گزشتہ روز مولانا فضل الرحمان نے اپنے خطاب میں آزادی مارچ کے شرکا کو بتایا کہ 12 ربيع الاول کی مناسبت سے سیرت النبی کانفرنس کا اہتمام کریں گے،آزادی مارچ میں سیرت النبی ﷺ کانفرنس منعقد کی جائے گی۔

مو لا نا فضل الرحمان کا مزید کہنا تھا کہ ہم ملک کو بچانے نکلے ہیں اور ملک کو بچائیں گے، ہم اپنی منزل کی طرف پہنچ کر ہی دم لیں گے۔

یہ مارچ کب تک جاری رہے گا تاحال یہ واضح نہیں تاہم مارچ میں شامل افراد نے ہر طرح کے مکمل انتظامات کر رکھے ہیں۔

آج بھی پرویز الہی اور مو لا نا فضل الرحمان کے درمیان اسی با رے میں آئندہ کی حکمت عملی سے متعلق ملا قات ہو رہی ہے۔