جمیعت علمائے اسلام کے سربراہ مولانا فضل الرحمان نے کہا ہے کہ عمران خان تم مکھیاں مارتے رہو اب عوام نے تم کو مسترد کردیا ہے۔

تفصیلات کے مطابق اسلام آباد میں آزادی مارچ کے شرکاء سے خطاب کرتے ہوئے جمیعت علمائے اسلام کے سربراہ مولانا فضل الرحمان نے کہا کہ دھرنا کا عشرہ مکمل ہونے پر میں شرکاء کا شکرگزار ہوں، ہم جبری حکومت کے خلاف میدان میں ہیں۔

جمیعت علمائے اسلام کے سربراہ نے کہا کہ اسلام میں جبرکی کوئی گنجائش نہیں، برصغیرکی پوری تاریخ ہمارے اکابرین سے بھری ہوئی ہے جبری تسلط کسی کابھی ہو آواز بلند ہونی چاہئے۔

مولانا فضل الرحمان نے یہ بھی کہا کہ حکمرانوں کی اس حاکمیت کوتسلیم نہیں کرتے اور حکمرانوں کوقوم کے مطالبے کوتسلیم کرنا ہوگا۔

مولانا فضل الرحمان کا کہنا تھا کہ  کہ حکومت نے وعدہ کیا تھا کہ ہم فاٹا کوہر سال ایک سو ارب روپے دیں گے اور دس سال تک مسلسل دیتے رہیں گے ، جبکہ انہوں نے کہا تھا کہ ہم کارخانوں کو دس سال تک ٹیکس کی چھوٹ دیں گے پھر کہا کہ پانچ سال تک ٹیکس کی چھوٹ دیں گے مگر ایک سال میں حکومت نے ٹیکسوں کی بھرمار کر کے رکھ دی ہے۔

شرکا سے خطاب کرتے ہوئے جمیعت علمائے اسلام کے سربراہ کا کہنا تھا کہ فاٹا کا صوبے میں انضمام نہیں کرسکے مگر کرتارپور کھولنے میں بہت جلد بازی دکھائی گئی ہے۔

مولانا فضل الرحمان کا یہ بھی کہنا تھا کہ ہم ہمیشہ 9 نومبرکویوم اقبال کےطورپرمناتےہیں لیکن پہلی بار اقبال کا دن گرونانک کےنام ہوگیا،پاکستان کی شناخت اس کانظریہ اورآئین ہے کسی کوپاکستان کےنظریے،آئین،جمہوریت سےکھیلنےکی اجازت نہیں دی جائے گی۔

جمیعت علمائے اسلام کے سربراہ مولانا فضل الرحمان کا مزید کہنا تھا کہ اس حکومت نے معیشت تباہ کرکے رکھ دی ہے ایک سال میں گندم کی کاشت میں 30 فیصد کمی جبکہ چاول کی کاشت میں چالیس فیصد کمی آئی ہے ، کپاس کا ہدف بھی اس سال پورا نہیں کرسکے ہیں۔