وزیراعظم عمران خان کی تمام وفاقی وازرتوں کے سیکریٹریز اور صوبائی چیف سیکریٹری صاحبان سے ملاقات ہوئی، جس میں سیکرٹری صاحبان نے کارکردگی سے متعلق وزیراعظم کو آگاہ کیا۔

اس موقع پر وزیراعظم عمران خان کا کہنا تھا کہ نیا پاکستان پرانے اور روایتی طریقوں سے نہیں چلایا جا سکتا، پی ٹی آئی حکومت کا سب سے بڑا چیلنج اسٹیٹس کو تبدیل کرنا ہے۔

عمران خان کا یہ بھی کہنا تھا کہ نوجوان طبقے کے لیے روزگار کے مواقع پیدا کرنا اور غربت کا خاتمہ ہمارا مشن ہےاور ہمیں تبدیلی کے خواب کو عملی جامہ پہنانے کے لئے روایتی طریقوں کو خیرآباد کہہ کرعوام کی فلاح کو مقدم رکھنا ہوگا۔

وزیراعظم نے کہا کہ اس وقت ملک کے معاشی حالات بہتری کی طرف جارہے ہیں، سرمایہ کار مختلف شعبوں میں دلچسپی کا اظہار کر رہے ہیں برآمدات بڑھ رہی ہیں جبکہ روپے کی قدر بھی بہتر ہورہی ہے۔

عمران خان نے یہ بھی کہا کہ سرمایہ کاروں کی جانب سے حکومتی پالیسیوں اوراب تک اٹھائے جانے والے اقدامات پر اعتماد نہایت حوصلہ افزا ہے کیونکہ اس تبدیلی کا اعتراف بین الاقوامی اداروں کی جانب سے کیا گیا ہےلیکن اس فضا کو ہمیں مزید بہتر بنانا ہے۔

وزیراعظم نے کہا کہ پاکستان میں سیاحت کا بہت پوٹینشل ہے جو ملک کی معاشی و سماجی ترقی میں اہم کردارادا کرسکتا ہےاور ہمیں اس پوٹینشل سے مکمل طور پر استفادہ کرنے کی ضرورت ہے۔

سیکریٹری صاحبان سے ملاقات میں وزیراعظم عمران خان نے یہ بھی کہا کہ سی پیک پاکستان کے لئے گیم چینجر ثابت ہوگا کیونکہ سی پیک منصوبوں سے پاکستان میں ترقی کا ایک نیا باب روشن ہوگا۔

اس موقع پر مشیر برائے ادارہ جاتی اصلاحات نے سول سروس ریفارمز کے حوالے سے بھی عمرام خان کو بریف کیا جبکہ وزیرِ اعظم نے ہدایت کی کہ ان سفارشات کو حتمی شکل دینے کا عمل جلد مکمل کیا جائے تاکہ سول سروس کی کارکردگی میں بہتری لائی جا سکے۔

وزیراعظم نے کہا کہ حکومت کو سول سرونٹس کی مشکلات کا اندازہ ہے، ان مشکلات کو دور کرنے اور سول سروس کو ماضی کی  طرح فعال بنانے کے لئے تمام  ممکنہ اقدامات اٹھائے جا رہے ہیں۔

اجلاس میں عمران خان کا کہنا تھا کہ سیکریٹریز کی تعیناتی کی مدت کی پالیسی وضع کردی گئی تاکہ آپ دل جمعی اور یکسوئی سے اپنے اپنے متعلقہ محکموں میں اپنی خدمات سرانجام دے سکیں۔

عمران خان کا یہ بھی کہنا تھا کہ ترقی تب ہی ممکن ہے جب صحیح اور بروقت فیصلے لیے جائیں،ایک ایسی حکومت کے دور میں جو سرکاری ملازموں پرکسی قسم کا سیاسی دباؤ نہ ڈالنے پر یقین رکھتی ہے وہاں آپ کے لئے اپنی بھرپور صلاحیتوں کو برؤے کار لانے اور قوم کی خدمت کرنے کا بہترین موقع ہے۔

وزیراعظم عمران خان کا مزید کہنا تھا کہ قابل ، پرعزم اور محنتی سول سروس حکومت کے ویژن کو عملی شکل دینے میں کلیدی کردار ادا کرتی ہے اسلئے آپ عوامی فلاح و بہبود اور ترقی کے لیے محنت کریں اور مسائل کا حل نکالیں۔

اجلس میں مشیر برائے ادارہ جاتی اصلاحات ڈاکٹر عشرت حسین، مشیر برائےاسٹیبلشمنٹ شہزاد ارباب، معاون خصوصی شہزاد اکبر ، صوبائی چیف سیکرٹریز بھی شریک ہوئے۔