جے یو آئی ف کے سربراہ مولانا فضل الرحمٰن نے کہا ہے کہ ہم یہ میدان سر کرچکے ہیں،ہم نے اپنی جان ہتھیلیوں پر رکھی ہوئی ہے، تم ہمارے خلوص اور حب الوطنی کا مقابلہ نہیں کرسکتے۔

تفصیلات کے مطابق اسلام آباد میں آزادی مارچ کے شرکاء سے خطاب کرتے ہوئے مولانا فضل الرحمٰن نے کہا کہ عمران خان سن لو یہ تحریک یہ سیلاب آگے بڑھتا جائےگا اور اگر یہ سیلاب پی ایم ہاؤس کی طرف بڑھنےکا فیصلہ کرلے تو کوئی نہیں روک سکتا۔

مولانا فضل الرحمٰن کا کہنا تھا کہ جمعہ جمعہ 8دن کی سیاست کرنیوالےہمیں سیاست بتائیں گے،انھوں نے کہا کہ وعدہ کرتے ہیں پیچھے نہیں جائیں گے، پلان اے ہے بی اور سی بھی ہےمگر اگلےاقدام کا فیصلہ باہمی مشاورت سےکریں گے۔

جے یو آئی ف کے سربراہ نے کہا کہ ہمیں کہا جارہا ہے کہ الیکشن کمیشن جاکر شکایت کریں، الیکشن کمیشن تو ہم سے بھی زیادہ بے بس ہے اور اگرالیکشن کمیشن بے بس نہ ہوتا توعوام کی اتنی بڑی تعداد یہاں نہ ہوتی، فیصلہ کیا ہے کہ کسی ٹریبونل، الیکشن کمیشن یا عدالت میں نہیں جائیں گے۔

مولانا فضل الرحمٰن نے یہ بھی کہا کہ طے ہوا تھا کہ الیکشن 2018ء کی دھاندلی کی تحقیقات پارلیمانی کمیٹی کرے گی، اس پارلیمانی کمیٹی کا ایک سال سے کوئی اجلاس نہیں ہوا۔

مولانا فضل الرحمٰن کا کہنا تھا کہ عوام کو ووٹ کا حق دینا ہوگا حکمرانوں کو جانا ہوگا، حکمرانوں کے پاس اس کے سوا کوئی آپشن نہیں۔

شرکا سے خطاب کرتے ہوئے مولانا فضل الرحمٰن کا کہنا تھا کہ اسلام آباد مارچ کے بعد یہ نہ سمجھیں کہ سفر رک گیا، ہم یہاں سے جائیں گے تو آگے پیش رفت کی طرف جائیں گے اور پورا پاکستان بند کر کے دکھائیں گے۔

جے یو آئی ف کے سربراہ کا یہ بھی کہنا تھا کہ قابل احتساب پارٹی پورے پاکستان پرحکومت کررہی ہے لیکن ہم اداروں کومتنازع نہیں بنانا چاہتے۔ انھوں نے کہا کہ یہاں اجتماع کا مطلب یہ نہیں کہ ہمارا سفر رک گیا،آج اسلام آباد بند ہے پورا پاکستان بند کرکے دکھائیں گے اور جنگ جاری رکھیں گے۔

مولانا فضل الرحمٰن نے کہا کہ آئندہ کا لائحہ عمل اپوزیشن کی مشاورت سے کریں گے، میں نے کل بھی کہا تھا اپوزیشن ہمارے ساتھ ایک اسٹیج پر ہے، ہر فیصلے میں مشاورت اور رہنمائی کرنا اپوزیشن کا حق ہے۔

مولانا فضل الرحمٰن نے یہ بھی کہا کہ دینی مدارس میں تو غریبوں کے لیے ہیں، جہاں مفت تعلیم دی جاتی ہے، بڑے شوق سے کہتے ہو، مدارس کے نصاب میں اصلاح ہونی چاہیے۔

جے یو آئی ف کے سربراہ مولانا فضل الرحمٰن نے مزید کہا کہ قابل احتساب پارٹی پورے پاکستان پر حکومت کررہی ہے، غریب مہنگائی کی وجہ سے راشن خریدنے کے قابل نہیں رہا، ظالم طبقہ غریب کو جینے نہیں دے رہا۔