میئر کراچی وسیم اختر نے کہا ہے کہ حکومت پاکستان نے کرتار پور راہداری کھول کر اچھا اقدام کیا ہے، اس سے جہاں سکھ برادری کو مذہبی رسومات کی ادائیگی میں سہولت ہوگی جبکہ دونوں کمیونٹی میں اچھے تعلقات پیدا ہوں گے۔

 تفصیلات کے مطابق میئر کراچی وسیم اختر نے پاکستان سکھ کونسل کے سرپرست اعلیٰ سردار رمیش سنگھ کی قیادت میں ملاقات کے لئے آنے والے وفد سے بات چیت کرتے ہوئے کہا کہ کراچی میں گرونانک کے 550 ویں جنم دن کی رسومات میں خود شرکت کروں گا۔

اس موقع پرسردار رمیش سنگھ نے میئر کراچی کو بتایا کہ پاکستان سکھ کونسل کی جانب سے گرونانک کے 550 ویں جنم دن کے موقع پر 11 نومبر رات ساڑھے 8 بجے ریلی کا اہتمام کیا جائے گا، میئر کراچی کی حیثیت سے آپ تقریب کا افتتاح کریں۔

میئر کراچی نے پروگرام میں شرکت پر رضامندی ظاہر کرتے ہوئے کہا کہ بلدیہ عظمیٰ کراچی کی جانب سے سکھوں کے مذہبی تہوار پر ہر ممکن تعاون کیا جائے گا۔

وسیم اختر نے کہا کہ شہر میں جتنے بھی گردوارے ہیں ان کے اطراف صفائی ستھرائی کی صورتحال اور اسٹریٹ لائٹس کی مرمت کی جائے۔

 میئر کراچی وسیم اختر نے ہدایت کی کہ تمام محکمے سکھوں کی مذہبی تہوار میں ان کے ساتھ ہرممکن تعاون کریں۔

واضح رہے اس سے قبل سیکریٹری خارجہ سہیل محمود نے ڈپلومیٹک کور کے غیر ملکی سفیروں کوپاکستان کے کرتار پور راہداری کھولنے کے اقدام پر بریفنگ دیتے ہوئے کہا کہ وزیراعظم عمران خان 9 نومبر کو کرتار پور راہداری کا افتتاح کریں گے۔

ترجمان دفتر خارجہ نے کہا تھا کہ باباگرونانک کے 550 ویں جنم دن کے موقع پر کرتارپور راہدرای کھولنا وزیر اعظم عمران خان کا ایک تاریخی اقدام ہے۔

سہیل محمود نے یہ بھی کہا کہ پاکستان نے یہ قدم نانک نام لیواؤں بالخصوص سکھ برادری کے ایک دیرینہ مطالبہ پراٹھایا ہے، کرتار پورراہداری کھولنا اسلامی اصولوں, پاکستان کی بین المذہب پالیسی کے فروغ اور قاید اعظم کے پر امن ہمسائیگی کے ویژن کے عین مطابق ہے۔