وزیر اعلی خیبر پختون خوا محمود خان نے کہا ہے کہ پی ٹی آئی موروثی سیاسی جماعت نہیں بلکہ ایک وژن اور مشن کے تحت وجود میں آئی ہے۔

تفصیلات کے مطابق وزیر اعلی خیبر پختون خوا محمود خان نے آزادی مارچ کے حوالے سے بیان میں کہا کہ پاکستان تحریک انصاف کی حکومت جمہوری اقدار اور روایات کی پاسداری پر یقین رکھتی ہے۔

 اپنے بیان میں محمود خان نے کہا کہ دنیا کی نظریں پاکستان پر جمی ہیں، مزید کسی تجربے کے متحمل نہیں ہو سکتے۔

وزیر اعلی خیبر پختون خوا کا کہنا تھا کہ آزادی مارچ کے قائدین ملک دشمن قوتوں کی آواز بننے کے بجائے تعمیری بات کریں جبکہ مارچ کے شرکاء  قومی اداروں پر بلا جواز اور بے بنیاد تنقید سے بھی گریز کریں۔

محمود خان کا یہ بھی کہنا تھا کہ مارچ کیلئے پی ٹی آئی کے سابقہ دھرنے کو دلیل بنانا غیر منطقی اور سمجھ سے بالاتر ہے کیونکہ پی ٹی آئی نے اپنے مطالبات اور تحفظات دلائل کی بنیاد پر حکومت وقت کے سامنے رکھے تھے۔

وزیر اعلی خیبر پختون خوا محمود خان کا مزید کہنا تھا کہ اسلام اور مذہب کے نام پر سیاسی مفادات کی جنگ لڑنا نہایت افسوسناک ہے، ہم سب مسلمان ہیں اور ختم نبوت پر نہ صرف کامل یقین رکھتے ہیں اسلئے ہم چاہتے ہیں کہ مارچ میں شامل قائدین آئینی حدود کی پاسداری کریں۔

واضح رہے کہ اس سے قبل بھی وزیراعلیٰ خیبرپختونخوا محمود خان نے پریس کلب ایبٹ آباد میں خطاب کرتے ہوئے کہا تھا کہ ملک تو آزاد ہو چکا یہ کونسا آزادی مارچ کر رہے ہیں،انھوں نے کہا  تھا کہ صوبائی حکومت  قانون کوہاتھ میں لینے والوں کےساتھ آہنی ہاتھوں سے نمٹے گی۔

خطاب میں محمود خان نے مزید کہا تھا کہ مولانا فضل الرحمان کے مارچ سے متعلق اپنے موقف پر قائم ہوں، امن کو برقرار رکھنے کے لیے ہر قدم اٹھائیں گے۔