وزیراعلیٰ سندھ مراد علی شاہ نے کہا کہ مولانا فضل الرحمان کے مارچ میں تمام اپوزیشن ساتھ ہے، عوام پی ٹی آئی حکومت سے مایوس ہو چکے ہیں۔

تفصیلات کے مطابق وزیراعلیٰ سندھ مراد علی شاہ نے میڈیا سے گفتگو کرتے ہوئے کہا کہ مہنگائی اور بے روزگاری عروج پر ہے جبکہ پی ٹی آئی سرکار نے ملک میں مہنگائی کا طوفان برپا کیا ہے۔

وزیراعلیٰ سندھ نے کہا کہ پی ٹی آئی کی سوا سال کی حکومت نے لوگوں سے روزگار چھینا ہے اورہم خود سندھ میں حکومت کا حصہ ہوتے ہوئے سندھ میں نوکریاں نہیں دے سکتے۔

مراد علی شاہ نے یہ بھی کہا کہ وفاقی حکومت پئسے کم دے رہی ہے اس وجہ سے ہم سندھ میں روزگار نہیں دے سکے، پی ٹی آئی کی وفاقی حکومت سے جلد نجات ملنے والی ہے۔

وزیراعلیٰ سندھ مراد علی شاہ کا کہنا تھا کہ بلاول بھٹو کہہ چکے ہیں کہ پی ٹی آئی کو بغیر سوچے سمجھے بیان دینے کا صلہ مل رہا ہے جبکہ وزیراعظم کے جانے سے معاملات آگے بڑھیں گے۔

مراد علی شاہ کا یہ بھی کہنا تھا کہ کشمیر کے معاملے پر پہلے ہی حکومت کو ناکامی ملی ہے لیکن سندھ پولیس کے گریڈ اوپر کرنے کا معاملہ جلد حل ہوجائے گا۔

وزیراعلیٰ سندھ مراد علی شاہ کا مزید کہنا تھا کہ رحیم یار خان ٹرین حادثے کی مکمل تحقیقات ہونی چاہئیں، جاں بحق افراد کے لواحقین کو تاحال لاشیں حوالے نہیں کی گئیں، تحقیقات سے پہلے لواحقین سے کہا جا رہا ہے کے قصوروار ان کےاپنے ہیں۔