وزارت خارجہ میں وزیر خارجہ مخدوم شاہ محمود قریشی کی ٹیلی کام سیکٹر سے منسلک ملائشیا کی معروف کمپنی ایڈٹکو گروپ کے وفد سے سی ای او عارف حسین اور سریش سدھو کی قیادت میں ملاقات ہوئی۔

اس موقع پرپاکستان میں سرمایہ کاری کے میسر مواقعوں سمیت باہمی دلچسپی کے امور پر تبادلہ خیال کیا گیا جبکہ ایڈیٹکو کمپنی کے وفد نے حکومت کی جانب سے تعاون پر وزیر خارجہ کا خصوصی شکریہ ادا بھی کیا۔

ملاقات میں ایڈیٹکو کمپنی کے وفد نے وزیر خارجہ کو کمپنی کی پاکستان کے ٹیلی کام سیکٹر میں سرمایہ کاری اور کاروباری حجم کو بڑھانے کے حوالے سے مختلف منصوبوں پر تفصیلی بریفنگ دی۔

ایڈٹکو وفد نے وزیر خارجہ کو بتایا کہ انکی کمپنی کے پاکستان میں تمام بڑے آپریٹرز کے ساتھ، طویل مدتی خدمات کے معاہدے طے ہیں جس میں بنیادی ڈھانچے کی سروسز کا وسیع پورٹ فولیو ، آپریشنز اینڈ مینٹینس سروسز اور توانائی کی بچت کے حل کے منصوبے شامل ہیں۔

ایڈیٹکو کمپنیہ کے سی ای او کا کہنا تھا کہا کہ پاکستان ہمارے لئے ایک اہم مارکیٹ ہے اور ہم پاکستان میں ٹیلی کمیونیکیشن کے شعبے کو فروغ دینے کے لئے جدید بنیادی ڈھانچے کے حل کو متعارف کروانے کا عزم رکھتے ہیں۔

ایڈیٹکو کمپنیہ کے سی ای او کا مزید کہنا تھا کہ پاکستان میں ہماری کمپنی اس وقت تک  750ملین ڈالر کی سرمایہ کاری کر چکی ہے – ڈیجیٹل صارفین کی روز بروز بڑھتی ہوئی تعداد کو پیش نظر رکھتے ہوئے ہم پاکستان میں اپنی سرمایہ کاری کے حجم کو ایک بلین ڈالر تک لے جانے کا عزم رکھتے ہیں۔

ایڈٹکو گروپ کے وفد سے ملاقات میں وزیر خارجہ مخدوم شاہ محمود قریشی نے کہا کہ پاکستان، بیرونی سرمایہ کاری کیلئے بہترین جگہ بن چکا ہے اور ہماری حکومت بیرونی سرمایہ کاروں کو بہترین سہولیات فراہم کر رہی ہے۔

وزیر خارجہ مخدوم شاہ محمود قریشی نے مزید کہا کہ ہم نے پاکستان کی ابھرتی ہوئ مارکیٹ کیطرف بیرونی سرمایہ کاروں کی توجہ مرکوز کروانے کیلئے معاشی سفارتکاری کا آغاز کر دیا ہے۔