وزیر اعلی بلوچستان جام کمال خان نے کہا ہے کہ نوجوانوں کی تعلیم، تربیت اور انہیں ہنرمند بنانا بھی حکومت کی اولین ترجیح ہے اور ہم اپنی یوتھ کو ترقیاتی عمل میں شراکت دار بنائیں گے۔

تفصیلات کے مطابق وزیراعلی بلوچستان جام کمال خان سے نیشنل ڈیفینس یونیورسٹی کے سابق صدر لیفٹیننٹ جنرل (ریٹائرڈ) عامر ریاض کی  ملاقات ہوئی ، جس میں باہمی دلچسپی کے مختلف امور پر تبادلہ خیال کیا گیا۔

جام کمال خان نے کہا کہ بلوچستان کی ترقی کے لئے میکنزم کو بہتر بنانے کی ضرورت ہے اور صوبائی حکومت اس جانب بھرپور توجہ دے رہی ہے۔

وزیر اعلی بلوچستان نے یہ بھی کہا کہ صوبے  کے لوگوں نے بہت مشکل دور گزارا ہے جبکہ ہمارے پاس انسانی وسائل کی بھی کمی رہی ہے لیکن ہمارے پاس وسائل کی اتنی کمی بھی نہیں جتنی کہ ہمیں وسائل کے استعمال کے طریقہ کار کو بہتر بنانے کی ضرورت ہے۔

اپنے بیان میں جام کمال خان کا کہنا تھا کہ ہم اپنے وسائل کو صوبے اور عوام کی ترقی کے لئے بروئے کار لانے کی پالیسی پر عمل پیرا ہیں۔

وزیر اعلی بلوچستان جام کمال خان کا مزید کہنا تھا کہ بلوچستان کے ساحل کی ترقی کا ماسٹر پلان بنایا جارہا ہے جبکہ پبلک پرائیویٹ پارٹنر شپ کے تحت سیاحت کے شعبہ کو بھی ترقی دینے کی منصوبہ بندی کی گئی ہے۔

اس موقع پرلیفٹیننٹ جنرل ریٹائرڈ عامر ریاض نے وزیراعلیٰ کے موقف سے اتفاق کرتے ہوئے کہا کہ بلوچستان وسائل کے حوالے بھرپورصوبہ ہے اور یہاں کے لوگ بھی باصلاحیت ہیں۔

لیفٹیننٹ جنرل ریٹائرڈ عامر ریاض نے بلوچستان کی ترقی اور خوشحالی کے لئے نیک خواہشات کا اظہار کرتے ہوئے کہا کہ بلوچستان میں ترقی کرنے کی بھرپور صلاحیت موجود ہے۔

واضح رہے اس سے قبل وزیراعلی بلوچستان جام کمال خان سے یونیسف کی چیف فیلڈ آفس کی سربراہ ریم ترازی کی ملاقات ہوئی تھی۔

ملاقات میں یونیسف فیلڈ آفس کی سربراہ نے وزیراعلیٰ کو یونیسف کے تحت جاری تشنج سے بچاؤ مہم سے آگاہ کیا تھا۔