منشیات برآمدگی کیس میں گرفتار سابق صوبائی وزیررانا ثنااللہ کولاہورکی انسداد منشیات کی خصوصی عدالت میں پیش کردیاگیا۔

تفصیلات کے مطابق رانا ثنااللہ کو 14 روزہ جوڈیشل ریمانڈ کے بعدعدالت کے روبروپیش کردیاگیا۔ رانا ثنا اللہ کی پیشی کے موقع پر سیکیورٹی کے سخت انتظامات کیے گئے ہیں۔

 انسداد منشیات عدالت کے جج شاکر حسن کچھ دیر بعد کیس کی سماعت شروع کریں گے۔

منشیات اسمگلنگ کیس میں گرفتاررانا ثناء اللہ سمیت دیگر ملزموں کو جوڈیشل ریمانڈ ختم ہونے پرعدالت میں پیش کیاجائےگا۔

انسداد منشیات عدالت کےجج شاکرحسن کے روبروملزموں کو پیش کیا جائے گا۔

رانا ثناء اللہ کی طرف سے سید فرہاد علی شاہ ایڈووکیٹ پیش ہوں گے۔ اینٹی نارکوٹکس فورس نے رانا ثناء اللہ کیخلاف منشیات اسمگلنگ کا چالان جمع کروا رکھا ہے۔عدالت نے تفتیشی افسر اور رانا ثناء اللہ کے کال ڈیٹا ریکارڈ کو بھی عدالتی ریکارڈ کا حصہ بنانے کا حکم دے رکھا ہے۔

اس سے قبل گزشتہ ہفتے عدالت میں سماعت کے دوران فاضل جج نے استفسار کیا تھا کہ کیا رانا ثنا اللہ کے کیس کا تمام ریکارڈ مکمل ہوچکا ہے؟ وکیل اے این ایف نے عدالت کو بتایا تھا کہ رانا ثنااللہ کے کیس کا تمام ریکارڈ مکمل ہوچکا ہے۔

رانا ثنا اللہ کے وکیل کا کہنا تھا کہ اے این ایف نے موقع پر کوئی کارروائی نہیں کی بلکہ آفس پہنچ کر جھوٹی ایف آئی آر درج کی گئی، رانا ثنا اللہ کے اسٹاف کے 5 ممبران کی درخواست ضمانت منظور ہوچکی ہے، سیف سٹی کے کیمروں نے ہمارے موقف کو درست ثابت کیا۔

انسداد دہشت گردی کی عدالت نے فریقین کے دلائل سننے کے بعد مسلم لیگ ن کے رہنما رانا ثنا اللہ کی ضمانت کی درخواست مسترد کردی تھی۔