پاک سرزمین پارٹی کے سربراہ مصطفیٰ کمال نے کہا ہے کہ وزیر اعظم کی انا ختم نہیں ہو رہی ، عمران خان کی تقریروں سے مایوسی پھیل رہی ہے، یہ تبدیلی نہیں جھوٹ ہے۔

تفصیلات کے مطابق پاکستان ہاؤس کراچی میں پریس کانفرنس کرتے ہوئے مصطفیٰ کمال نے کہا کہ 70 سال پہلے آزاد ہونے والا ملک آج بھی اپنوں کے ہاتھوں یرغمال بنا ہوا ہے، ملک آئینی بحران سے دوچار ہے۔

وزیراعظم کو مخاطب کرتے ہوئے مصطفیٰ کمال نے کہا کہ آپ وزیراعظم بننے سے پہلے پاپولر انسان تھے لیکن آج پورا ملک آپ کو بددعائیں دے رہا ہے۔

سربراہ پی ایس پی نے  یہ بھی کہا کہ وزیراعظم ہمارے مسائل کے لئے وزیراعلی سندھ سے تو بات نہیں کرسکتے لیکن مودی سے بات کرنے کیلئے تیار ہیں

پاک سرزمین پارٹی کے سربراہ مصطفیٰ کمال نے مزید کہا کہ کراچی کیلئے کچھ نہیں ہورہا ،چلتے ہوئے منصوبے بھی اس حکومت میں بند ہوگئے ہیں، صرف ٹوئٹر پر شہر کی صفائی کروائی جارہی ہے، دنیا میں تیزی سے ترقی کرنے والا شہر مسائل کے انبار میں تبدیل ہوچکا ہے ۔

واضح رہے اس سو قبل سندھ ہائی کورٹ میں پاک سرزمین پارٹی کے سربراہ مصطفیٰ کمال کی پراجیکٹ ڈائریکٹرکی حیثیت سے معطلی کیخلاف درخواست دائر کردی گئی تھی۔

سماجی کارکن سید محمد اقبال کاظمی نے درخواست میں موقف اختیار کیا کہ شہر میں بارشوں کے باعث ابتر صورتحال پیدا ہوئی ہے،مئیر کراچی وسیم اختر اور محکمہ بلدیات اپنی ذمہ داریاں نبھانے کو تیار نہیں، مصطفیٰ کمال کو پروجیکٹ ڈائریکٹر گاربیج تعیناتی کے اگلے روز ہی معطل کر دیا گیا تھا۔

درخواست میں کہا گیا تھا کہ مئیر کراچی کو اگر مصطفی کمال سے شکایت تھی تو ضابطے کے تحت پہلے شوکاز نوٹس دیا جاتا شوکاز نوٹس کے بغیر معطلی کا نوٹیفکیشن غیر قانونی قرار دیا جائے۔

درخواست گزار سید محمد اقبال کاظمی نے موقف اختیار کیا ہے کہ پروجیکٹ ڈائریکٹر کی تعیناتی کے اگلے روز ہی انہیں معطل کر دینا غیرقانونی ہے، مئیر کراچی وسیم اختر اور محکمہ بلدیات اپنی ذمہ داریاں نبھانے کو تیار نہیں ہیں اس لیے مصطفیٰ کمال نے شہر کو کچرے سے پاک کرنے کے لیے 90 روزہ چیلنج قبول کیا تھا۔