وزیراعلیٰ پنجاب عثمان بزدار نے صوبائی وزیر قانون راجہ بشارت کی سربراہی میں ضلع راجن پوراور رحیم یار خان کے کچےعلاقے کی ترقی کے لیے خصوصی کمیٹی قائم کردی۔

تفصیلات کے مطابق بارہ رکنی کمیٹی کے ارکان میں ایم این اے ریاض محمود مزاری، ڈپٹی سپیکر پنجاب اسمبلی دوست محمد مزاری شامل کئے گئے جبکہ سرکاری ارکان میں سپیشل سیکریٹری داخلہ پنجاب، کمشنر و آرپی او ڈی جی خان، دونوں اضلاع کے ڈپٹی کمشنر، ڈی پی اوز، آئی بی اور سپیشل برانچ کے نمائندے شامل کئے گئے ہیں۔

 ذرائع کا کہنا تھا کہ تفویض کردہ فرائض کے مطابق کمیٹی علاقہ میں جرائم کی صورتحال اور رحجان کا جائزہ لے گی جبکہ سپیشل کمیٹی علاقہ کی اراضی مقامی کاشتکاروں اور مزارعین کو پٹے پر دینے کے لیے پالیسی مرتب کرے گی۔

ذرائع کا یہ بھی کہنا تھا کہ علاقہ میں تعلیم و صحت سمیت دیگر شعبوں کے لیے ترقیاتی منصوبے بنائے جائے گے جبکہ سرکاری بھرتیوں میں علاقے کے نوجوانوں کے جسمانی و تعلیمی معیار میں قانون کے مطابق رعایات یا ترامیم  بھی تجویز کی جائے گی۔

ذرائع کا مزید کہنا تھا کہ کمیٹی کے ارکان پندرہ دنوں میں کچے علاقے کا دورہ کر کے وہاں کے معززین سے مشاورت کریں اور رپورٹ وزیر اعلیٰ کو بھجوائیں گے۔

واضح رہے اس سے قبل بھی وزیراعلیٰ پنجاب سردار سے مختلف اضلاع سے تعلق رکھنے والے اراکین صوبائی اسمبلی کی ملاقات ہوئی تھی۔

ملاقات میں اراکین صوبائی اسمبلی نے فرداً فرداً وزیراعلیٰ کو اپنے حلقوں کے مسائل، ترقیاتی کاموں اور فلاح عامہ کے منصوبوں پرپیشرفت سے آگاہ کیا تھا۔

سردار عثمان بزدار کا کہنا تھا کہ قومی وسائل کو ذاتی مقاصد کیلئے استعمال کرنا خیانت ہے، سرکاری خزانے کی پائی پائی کے امین ہیں اور کسی کو قومی وسائل کی لوٹ مار نہیں کرنے دیں گے۔

وزیراعلیٰ پنجاب سردار عثمان بزدار  کا یہ بھی کہنا تھا کہ عام آدمی کو ریلیف دینے کیلئے ہرممکن اقدام اٹھائیں گے اور عوام کا پیسہ عوام پر ہی خرچ ہوگا۔

وزیراعلیٰ پنجاب سردار عثمان بزدار کا مزید کہنا تھا کہ ہمارا ہر قدم عوام کو ریلیف کی فراہمی کیلئے ہے اسلئے اشیائے ضروریہ کی قیمتوں میں غیر ضروری اضافہ برداشت نہیں کیا جائے گا۔