چودھری سرور کا کہنا ہے کہ چاہتے ہیں نواز شریف کو جلدی بیرون ملک بھجوا دیں، یقین ہے آج نواز شریف کا نام ای سی ایل سے نکال دیا جائے گا۔

تفصیلات کے مطا بق گورنر پنجاب چودھری محمد سرور نے میڈیا سے گفتگو کرتے ہوئے کہا ہےکہ نواز شریف کی صحت پر سیاست نہیں کی، چاہتے ہیں جلد انہیں بیرون ملک بجھوا دیا جائے، کچھ قانونی پہلوؤں کی وجہ سے نواز شریف کا نام ای سی ایل سے نہیں نکل سکا ۔

ادھر وزیر صحت پنجاب ڈاکٹر یاسمین راشد نے پریس کانفرنس کرتے ہوئے کہا نواز شریف کی تمام رپورٹس ڈاکٹرز کو دے دی گئی تھیں، ان کو سٹیرائیڈز بھی دیئے گئے، سابق وزیراعظم کی شوگر کبھی کنٹرول نہیں ہوئی، وہ جب علاج کیلئے آئے ان کے پلیٹ لیٹس بہت کم تھے، نواز شریف کے علاج کیلئے دیگر ڈاکٹرز کی مدد بھی لی۔

دوسری جا نب یاسمین راشد کا کہنا ہے کہ سا بق وزیراعظم نواز شریف جب تشریف لائے تو ان کی حالت تشویشناک تھی، ہم نے بورڈ پر کسی قسم کا دباؤ نہیں ڈالا، میڈیکل بورڈ خودمختار ہے، کوئی سیاسی دباؤنہیں، نواز شریف کی صحت سے متعلق بورڈ آج دوبارہ بیٹھے گا۔

ترجمان مسلم لیگ ن مریم اورنگزیب نے کہا کہ حکومت کا طبی بورڈ بھی کہہ چکا ہے کہ نواز شریف کو علاج کے لیے باہر بھجوایا جائے، اسپتال سے ڈسچارج کے وقت ڈاکٹرز نے بیرون ملک علاج کی تجویز دی، گزشتہ رات فل بورڈ نے بیرون ملک علاج کی سفارش کی۔

واضح رہے کہ جاتی امرا میں سابق وزیراعظم کے بیرون ملک سفر کی تیاریاں شروع کر دی گئی ہیں، شریف خاندان نواز شریف کا نام ای سی ایل سے نکلنے کے لیے پرامید ہے تاہم ہفتہ وار تعطیل کے باعث نواز شریف کا نام ای سی ایل سے نکلنے پر تاخیر ہوئی۔