وزیراعلیٰ پنجاب سردار عثمان بزدارسے پاک چین فرینڈ شپ ایسوسی ایشن کے صدر اور اقوام متحدہ کے سابق انڈر سیکرٹری جنرل  شازوکانگ کی قیادت میں بزنس مینوں کے وفد کی ملاقات ہوئی۔

ملاقات میں پاکستان اور چین کے درمیان تعلقات کے فروغ ، مختلف شعبوں میں تعاون بڑھانے اور سی پیک کے تحت منصوبوں کے حوالے سے تبادلہ خیال کیا گیا جبکہ سی پیک کے تحت تعاون کومزید فروغ دینے پراتفاق بھی ہوا۔

اس موقع پرمشیر ڈاکٹر سلمان شاہ نے پنجاب میں سرمایہ کاری کے فروغ اور کاروبار میں آسانیاں پیدا کرنے کے حوالے سے کئے جانے والے اقدامات کے بارے میں بریفنگ دی۔

وزیراعلیٰ پنجاب نے کہا کہ چین پاکستان کا ایسا بااعتماد اور مخلص دوست ہے جس نے مشکل کی ہر گھڑی میں پاکستان کا ساتھ نبھایا ہے، چین کے ساتھ پاکستان کے تعلقات نئی بلندیوں کو چھو رہے ہیں۔

سردار عثمان بزدار نے یہ بھی کہا کہ پاکستان اور چین کی دوستی کا رشتہ پہلے سے کہیں زیادہ مضبوط ہو چکا ہے جبکہ دونوں ممالک کے درمیان دوستی ہر گزرتے لمحے مضبوط سے مضبوط تر ہورہی ہے۔

وزیراعلیٰ پنجاب کا کہنا تھا کہ سی پیک پاکستان کیلئے ایک گیم چینجر ہے، دونوں ملکوں کے درمیان معاشی و اقتصادی تعاون کی نئی تاریخ رقم ہوئی ہے۔

عثمان بزدار کا یہ بھی کہنا تھا کہ چینی قیادت کی شبانہ روز محنت کی بدولت چین دنیا کی ایک بڑی معاشی قوت بن چکا ہے اور پاکستان میں چین کے تعاون سے سی پیک کے منصوبوں سے ترقی و خوشحالی کی ٹھوس بنیاد رکھی جا چکی ہے۔

وزیراعلیٰ پنجاب نے کہا کہ تحریک انصاف کی حکومت کے دور میں پاکستان اور چین کیساتھ تعلقات مزید وسیع اور مضبوط ہوئے ہیں، دو طرفہ تعاون کومزید فروغ دینے کے لئے مستقبل میں تسلسل کے ساتھ رابطے رکھنا ضروری ہے۔

عثمان بزدار نے یہ بھی کہا کہ چین کے سرمایہ کاروں کی جانب سے پنجاب میں مزید سرمایہ کاری کا خیرمقدم کریں گے اور چینی سرمایہ کاروں کو ہر ممکن سہولتیں دیں گے۔

وزیراعلیٰ پنجاب سردار عثمان بزدارنے مزید کہا کہ پنجاب میں نجی سرمایہ کاری میں اضافے کے لئے پبلک پرائیویٹ پارٹنر شپ اتھارٹی قائم کی گئی ہے جبکہ چینی سرمایہ کار پبلک پرائیویٹ پارٹنر شپ کے تحت منصوبوں میں سرمایہ کاری کے مواقع سے فائدہ اٹھا سکتے ہیں۔-

اس موقع پرچائنہ پاکستان فرینڈ شپ ایسوسی ایشن کے صدر شازوکانگ نے کہا کہ چائنہ پاکستان اکنامک کوریڈور نے دونوں ملکوں کے تعلقات کو نئی بلندیوں تک پہنچایا ہے، پاکستان اور چین کی دوستی ،دو طرفہ معاشی تعاون ہر گزرتے لمحے مضبوط ہورہے ہیں۔

شازوکانگ نے یہ بھی کہا کہ سی پیک سے پاک چین تعلقات کو نئی جہت ملی ہے جبکہ  پاک چین دوستی دنیا میں امن، محبت، تعاون اور والہانہ جذبوں کی روشن مثال ہے۔

شازوکانگ کا کہنا تھا کہ سی پیک روڈ اینڈ بیلٹ پراجیکٹ کا فلیگ شپ پروگرام ہے، پاکستان اور چین کے عوام کے رشتے باہمی احترام سے جڑے ہوئے ہیں۔

چائنہ پاکستان فرینڈ شپ ایسوسی ایشن کے صدر شازوکانگ کا یہ بھی کہنا تھا کہ چینی عوام کے لئے پاکستان دوسرا گھرہے اسلئے چین پنجاب کے ساتھ بھی مختلف شعبوں میں تعاون بڑھانے کے لئے ہرممکن اقدام اٹھائیں گے۔

چین کے قونصل جنرل لانگ ڈنگ بن اور چین کے36رکنی بزنس وفد کے اراکین جبکہ صوبائی وزراء میاں محمود الرشید،سردار محمد آصف نکئی،سردار حسنین بہادر دریشک، محمد محسن لغاری، اختر ملک،ملک نعمان احمد لنگڑیال،مشیر ڈاکٹر سلمان شاہ، چیئرمین منصوبہ بندی و ترقیات،پرنسپل سیکرٹری وزیراعلیٰ پنجاب، متعلقہ محکموں کے سیکرٹریز،اعلیٰ حکام اور پاکستانی صنعت کار بھی اس موقع پر موجود تھے-