وفاقی وزیر پاور ڈویژن عمر ایوب خان نے کوریا کے سفیر کواک سنگ کیو سے ملاقات کی ۔

ملاقات میں وفاقی وزیر نے توانائی کے شعبے میں حکومت کی طرف سے کئے گئے اقدامات پر روشنی ڈالی۔

 وفاقی وزیرعمر ایوب کا کہنا تھا کہ تمام معاملات میں شفافیت برقرار رکھنا حکومت کی اولین ترجیح ہے، شفافیت کے فروغ سے رکاوٹیں دور ہو رہی ہیں اور ملک میں سرمایہ کاری کیلئے سازگار ماحول مہیا ہو ا ہے، وفاقی وزیر نے کورین کمپنیوں کی طرف سے پاکستان میں مزید سرمایہ کاری میں گہری دلچسپی اور عملی اقدامات پر شکریہ ادا کیا۔

 عمر ایوب خان نے مزید کہا کہ  کوریا کی مختلف کمپنیوں نے پاکستان کے انرجی سیکٹر میں سرمایہ کاری میں دلچسپی کا اظہار کیا ہے اور پاکستان کو ٹیکنالوجی کی منتقلی سمیت ایک دوسرے کے تجربے اور مہارتوں سے سیکھنے پر زور دیا ہے ۔

 وفاقی وزیر نے متبادل توانائی کے بارے کورین سفیر کو آگاہ کرتے ہوئے کہا کہ 2030ء تک ساٹھ فیصد سے زیادہ بجلی ان وسائل سے بنائی جائے گی، انہوں نے کہا کہ کئی یوروپین ممالک، چین اور دیگر ممالک پاکستان میں سولر پینل، ونڈ ٹربائن بنانے کی فیکٹریاں پاکستان میں لگانے کیلئے کام کر رہی ہیں ، کورین کمپنیاں بھی پاکستان میں یہ فیکٹریاں لگا سکتی ہیں کیونکہ مستقبل میں نہ صرف پاکستان بلکہ وسطی ایشیائی ملک کر بر آمد کرنے کے بھی خاصے مواقع ہیں۔

 کورین سفیر نے اس موقع پر پاور ڈویژن کے حالیہ اقدامات کو سراہا جن کی وجہ بہت سارے پاور پراجیکٹس مکمل ہوئے، کورین سفیر نے بتایا کہ اس سے سرمایہ کاروں کا اعتماد بحال ہوا ہے، انہوں نے کہا کہ متعدد کورین کمپنیاں پاکستان میں سرمایہ کاری کی خواہش مند ہیں اور پاکستان کے انرجی سیکٹر کے متعلق تمام معلومات اکھٹا کر رہی ہیں، انہوں نے کہا کہ موجودہ حکومت کی پالیسیوں کی وجہ سے انرجی سیکٹر دنیا کے چوٹی کے سرمایہ کاروں کی توجہ کا مرکز بن چکا ہے۔

وفاقی وزیر نے  تمام سرمایہ کاروں کو یکساں کاروباری سہولیات دینے کا اعادہ کیا۔ تمام اداروں کو خصوصی ہدایات دیں گئیں ہیں کہ ہر طرح کا تعاون ایک چھت کے نیچے فراہم کیا جائے۔

 وزیر توانائی وفاقی وزیر نے کورین کمپنیوں کا گل پور اور آٹھ مقام میں ہائیڈرو پراجیکٹس لگانے کو سراہا،  وفاقی وزیر نے کورین کمپنیوں کی طرف سے پاکستان میں مزید سرمایہ کاری میں گہری دلچسپی اور عملی اقدامات پر شکریہ ادا کیا۔