ایل این جی کیس میں مفتاح اسماعیل کی رہائی کے لیے ضمانتی مچلکے احتساب عدالت میں جمع کرادیئے گئے ہیں۔

تفصیلات کے مطابق مفتاح اسماعیل کی ضمانت کے لئے ایک کروڑ کے ضمانتی مچلکے مفتاح اسماعیل کے وکیل نے احتساب عدالت  میں جمع کرا دیئے گئے ہیں۔

اسلام آباد ہائیکورٹ نے مفتاح اسماعیل کی ضمانت منظوری کا مختصر حکم جاری کردیا ہے۔

یاد رہے کہ اسلام آباد ہائیکورٹ نے 23 دسمبر کو مفتاح اسماعیل کی ضمانت منظور کی تھی، ذرائع کے مطابق ایل این جی کیس میں زیر حراست لیگی رہنما کی درخواست ضمانت سے متعلق اسلام آباد ہائیکورٹ میں سماعت ہوئی تھی جس میں اسلام آباد ہائی کورٹ نے مؤقف اختیار کیا کہ چیئرمین سوئی سدرن کمپنی زہیر صدیقی گواہ ہیں انہیں دھمکیاں دی جارہی ہیں، سیکریٹری پیٹرولیم ایل این جی کیس میں وعدہ معاف گواہ بن گئے تھے۔

عدالت کا مفتاح اسماعیل کو ضمانت پر رہا کر نے کا حکم  

واضح رہے کہ چیف جسٹس اسلام آباد ہائیکورٹ نے ریمارکس دیئے تھے کہ مفتاح اسماعیل کو پابند کرتے ہیں کہ رہائی کے بعد روزانہ تفتیشی کو فون کریں گے بعد ازاں عدالت نے مفتاح اسماعیل کی ضمانت منظور کرتے ہوئے رہا کرنے کا حکم دے دیا تھا۔

قومی احتساب بیورو نے سابق وزیراعظم شاہد خاقان عبا سی کو جولائی 2019 اور مفتاح اسماعیل کو 7 اگست کو گرفتار کیا تھا، ن لیگی رہنما مفتاح اسماعیل سابق وزیراعظم شاہد خاقان عباسی کے ساتھ ایل این جی ٹھیکہ کیس میں شریک ملزم تھے جبکہ اس کیس میں گرفتار سابق مشیر خزانہ اور سابق ایم ڈی پی ایس او عمران الحق کو  11روزہ جسمانی ریمانڈ پر نیب کے حوالے کر دیا گیا تھا۔

مسلم لیگ ن کے سابق دور حکومت میں اس وقت کے وزیر پٹرولیم شاہد خاقان عباسی نے قطر کے ساتھ ایل این جی درآمد کرنے کا معاہدہ کیا تھا سابق وزیر پر الزام ہے کہ انہوں نے درآمد اور تقسیم کا 220 ارب روپے کا ٹھیکہ دیا جس میں وہ خود حصہ دار ہیں۔