وزیراعظم عمران خان نے کہا ہے کہ سال 2020 عوام کا سال ہے جبکہ حکومت کی بھرپور کوشش ہے معاشی استحکام کے ثمرات عام آدمی تک میسر آئیں اور عام آدمی کی زندگیوں میں بہتری واقع ہو۔

تفصیلات کے مطا بق وزیراعظم عمران خان سے قائدایوان سینیٹ شبلی فراز کی قیادت میں  حکومتی واتحادی سینیٹرز کی ملاقات ہوئی ، جس میں وزیراعظم نے سینیٹرز کے مسائل کے حل کرنے کیلئے گائیڈ لائنز جاری کیں۔

ملاقات میں ملکی مجموعی صورتحال، سال2019میں حکومتی اصلاحاتی ایجنڈے پر بات چیت ہوئی جبکہ آنے والے سال میں عوامی مسائل سے متعلقہ قانون سازی پر بھی گفتگو کی گئی۔

اس موقع پر  وزیراعظم عمران خان نے ایوان بالاء کی کارکردگی پر اظہار اطمینان کیا اور   سینٹرز نے معیشت کے استحکام کے لئے حکومتی کاوشوں پر بھرپور اعتماد کا اظہار کیا گیا جبکہ سینیٹرز نے احساس پروگرام، پناہ گاہوں کی تعمیر، لنگر خانوں جیسے متعدد اقدامات کو بھی سراہا۔

عمران خان 2020 میں اسمبلیاں تحلیل کردیں گے؟ ماہرعلم نجوم کی بڑی پیشگوئی

وزیراعظم نے کہا آئندہ سال عوامی مفادات اور عوام سے متعلق مسائل کے حل کو اجاگر کرنے کے لیے قانون سازی پر بھرپور توجہ دی جائےکیونکہ  ہم نئے سال میں حقیقی تبدیلی کے ثمرات عوام کو پہنچیں گے۔

عمران خان  نے یہ بھی کہا کہ موجودہ حکومت کا ایجنڈا اصلاحات اور عوام کی فلاح و بہبود ہےاور مشکل ترین مالی حالات کے باوجود حکومتی کوششوں کے نتیجے میں معیشت کو استحکام ملا ہے۔

وزیراعظم کا  کہنا تھا کہ  حکومتی کوششوں کے نتیجے میں اقتصادی اعشاریوں میں آنے والی بہتری کا اعتراف بین الاقوامی اداروں کی جانب سے بھی کیا گیا جبکہ کاروباری برادری اور سرمایہ کاروں کا اعتماد بحال ہوا ہے۔

عمران خان  کا یہ بھی کہنا تھا کہ کرپشن کے ناسور نے ملک کی معیشت کو کھوکھلا کیا ہے اور کرپشن کا خاتمہ پی ٹی آئی حکومت کے منشور کا بنیادی جزو ہے۔

وزیراعظم عمران خان کا مزید کہنا تھا کہ کرپٹ عناصر کو قانون کے دائرے میں لانے اور کرپشن کے خلاف بھرپور جدوجہد جاری رہے گی جبکہ نیا سال ملکی ترقی و اقتصادی استحکام کا سال ہوگا۔