صدر مملکت ڈاکٹر عارف علوی نے کہا کہ ارکین پارلیمان بچوں کے حقوق کے تحفظ کے لئے اپنا کردار ادا کریں۔

تفصیلات کے مطابق  یوم انسانی حقوق و حقوق اطفال کے حوالے سے ایک اہم تقریب سے خطاب میں صدر مملکت ڈاکٹر عارف علوی  نے کہا کہ مقبوضہ کشمیر میں بھارتی فورسز پیلٹ گنز کے ذریعے بچوں کو نابینا کررہی ہیں اور بچوں کا جسمانی، جنسی اور معاشی استحصال انتہائی تکلیف دہ ہے۔

صدر مملکت ڈاکٹر عارف علوی نے کہا کہ بچوں کے تحفظ کے حوالے سے قوانین موجود ہیں لیکن ان پر عملدرآمد میں مسائل ہیں۔

ڈاکٹر عارف علوی کا کہنا تھا کہ والدین بچوں میں اعتماد پیدا کریں تاکہ وہ انہیں اپنے تمام مسائل سے آگاہ کریں۔ بچوں کے حقوق کے تحفظ اور مسائل کے حل کے لئے کمیونٹی کی سطح پر حکمت عملی وضع کرنے کی ضرورت ہے۔

پاکستان ایک محفوظ اور مستحکم ملک ہے، عارف علوی

ڈاکٹر عارف علوی کا  یہ بھی کہنا تھا کہ مقبوضہ کشمیر کی حالت زار دیکھ کر دکھ اور افسوس ہوتا ہے، ایک ہزار افراد شہید ہوئے ہیں۔ مائیں بیوہ اور بچے یتیم ہوئے ہیں، ان مظالم کو بھی اجاگر کرنا انسانی فریضہ ہے۔

صدر مملکت ڈاکٹر عارف علوی نے ارکان پارلیمنٹ پر زور دیا ہے کہ وہ بچوں کے حقوق کے تحفظ اور ان پر تشدد کی روک تھام کے لئے معاشرے میں شعور اجاگر کرنے کے لئے اپنا کردار ادا کریں۔

 واضح رہے کہ صدر مملکت نے گزشتہ روز ایک نجی ٹی وی پر نشر ہونے والے پروگرام میں ہراسگی کا شکار بننے والے بچوں کرنے پر غم و غصے کا اظہار کیا تھا۔

عارف علوی نے کہا تھا کہ نجی ٹی وی چینل اپنے شو میں ہراسگی کا شکار بچوں کو بلا کر پروگرام کرتے ہیں جو کہ انتہائی نا مناسب ہے، کیونکہ یہ بچے  پہلے ہی ذہنی اور جسمانی طور پر سہمے ہوئے  ہوتے ہیں ، اُن کو شو کے لیے بلایا جانا مناسب نہیں ہے۔