صدر مملکت ڈاکٹر عارف علوی سے گورنرسندھ عمران اسماعیل کی گورنرہاﺅس میں ملاقات ہوئی۔

ملاقات میں انسداد منشیات کے لئے ہر ممکن وسائل بروئے کار لانے کے عزم کا اظہار کیا جبکہ انسداد منشیات ،آگاہی مہم ، تعلیمی اداروں سے خاتمہ ، نوجوان نسل کومنشیات سے محفوظ رکھنے کے لئے اٹھائے گئے  اقدامات پر تبادلہ خیال بھی کیا گیا۔

اس موقع پر گورنرسندھ نے سٹیزن پولیس لائژن کمیٹی میں انسداد منشیات کے لئے قائم کردہ سیل کے بارے میں صدر مملکت ڈاکٹر عارف علوی کو تفصیل سے آگاہ کیا ۔

گورنر سندھ عمران اسماعیل نے کہا کہ صوبہ کے مختلف تعلیمی اداروں میں اینٹی نارکوٹکس فورس، پولیس اور سی پی ایل سی کے تعاون سے جاری آگاہی مہم جاری ہے ۔

ملاقات میں صدر مملکت ڈاکٹر عارف علوی نے کہا کہ منشیات کے خاتمےکے لیے گورنر سندھ عمران اسماعیل کے اقدامات قابل ستائش ہیں۔

صدر مملکت نے  ہدایت دی کہ تعلیمی اداروں میں منشیات کے مکمل خاتمہ کو ہر صورت یقینی بنایا جائے ، ملوث عناصر کے خلاف بھرپور ایکشن لینا وقت کا اہم تقاضہ ہے ۔

منشیات کا استعمال ایک فرد نہیں پورے خاندان کو تباہ کر دیتا ہے، صدر مملکت

 ڈاکٹر عارف علوی نے کہا کہ نوجوان نسل کو اس موذی لعنت سے محفوط رکھنے کے لئے تسلسل سے آگاہی مہم چلانا ہوگی  جبکہ والدین بچوں کو منشیات سے محفوظ رکھنے میں کلیدی کردار ادا کرسکتے ہیں۔

اس سے قبل صدر مملکت اور گورنرسندھ نے اینٹی نارکوٹکس فورس کی جانب سے بھاری مقدار میں منشیات تلف کرنے کا جائزہ بھی لیا تھا۔

دوسری جانب صدر مملکت ڈاکٹر عارف علوی نے منشیات نذر آتش کرنے کی تقریب سے خطاب کرتے ہوئے کہا کہ منشیات کا استعمال صرف افراد کو ہی نہیں خاندان کو بھی تباہ کر دیتا ہے۔

تقریب سے خطاب میں صدر مملکت کا کہنا تھا کہ منشیات کی نئی اقسام نوجوان نسل کو تیزی سے اپنے شکنجے میں جکڑ رہی ہیں، والدین کو اپنے بچوں پر خصوصی نگاہ رکھنے کی ضرورت ہے کیونکہ جو معاشرے اپنی اخلاقی اقدار کی بنیاد پیسے پر رکھتے ہیں وہ تباہ ہو جاتے ہیں

صدر ڈاکٹر عارف علوی نے منشیات کی روک تھام سمیت مختلف معاشرتی مسائل کے حوالے سے مناسب آگاہی پیدا کرنے کی ضرورت پر زور دیا ہے