اپوزیشن جماعت مسلم لیگ (ن) کے رہنما سینیٹر مشاہد اللہ خان نے کہا ہے کہ  اپوزیشن سیکرٹری الیکشن کمیشن بابر یعقوب کی بطور چیف الیکشن کمشنر تقرری پر ہرگز راضی نہیں ہوگی۔

تفصیلا ت  کے مطابق   اپوزیشن جماعت مسلم لیگ (ن) کے رہنما سینیٹر مشاہد اللہ خان نے میڈیا سے بات کرتے ہوئے کہا کہ کہ اگر حکومت صوبہ سے بھی الیکشن کمیشن کا ممبر لینا چاہتی ہے تو ہماری شرط ہے کہ چیف الیکشن کمشنر متفقہ ہو۔

مشاہد اللہ خان  نے یہ بھی کہا کہ پارلیمانی کمیٹی کے گزشتہ میٹنگ میں طے ہوا تھا کہ چیف الیکشن کمشنر اور 2 ارکان کا فیصلہ اکٹھا ہوگا لیکن آج حکومت کا یہ موقف تھا کہ پہلے 2 ارکان کی تقرری پر بات ہو۔

اپنے بیان میں مسلم لیگ ن کے رہنما کا کہنا تھا کہ ہم نے حکومت سے کہا کہ ایسا نہیں ہوسکتا، تینوں تقرریاں ایک ساتھ ہوں گی، ہمارے پاس مینڈیٹ ہے لیکن حکومتی اراکین کو ہر بات وزیراعظم سے پوچھنا پڑتی ہے اور وزیراعظم کا رویہ غیر سنجیدہ ہے کہ ہونا ہے تو ہو اور نہیں ہونا تو نہ ہو۔

مشاہد اللہ خان کا یہ بھی کہناتھا کہ حکومت کو بابر یعقوب کو نامزد ہی نہیں کرنا چاہیے تھا کیونکہ وہ موجودہ سیکرٹری الیکشن کمیشن ہیں۔

مسلم لیگ ن کے رہنما مشاہداللہ خان  کا  مزید کہنا  تھا کہ عام انتخابات 2018 میں دھاندلی کے ذمہ دار بابر یعقوب ہیں، جو یہ ہی نہ بتا سکے کہ آر ٹی ایس کیسے فیل ہوا،اپوزیشن سیکرٹری الیکشن کمیشن بابر یعقوب کی بطور چیف الیکشن کمشنر تقرری پر ہرگز راضی نہیں ہوگی۔

یاد رہے کہ چیف الیکشن کمشنر اور ممبران الیکشن کمیشن کی تقرری کا معاملہ اٹک کررہ گیا ناموں پر اتفاق رائے نہ ہونے کے باعث پارلیمانی کمیٹی کا اجلاس تیسری مرتبہ موخر کرنا پڑا تھا ، اپوزیشن نے چیف الیکشن کمشنر کے ایک عہدے کے بدلے دو ممبران مانگ لئے ا ور اب اجلاس کل چار بجے ہوگا۔