صدر مملکت ڈاکٹر عارف علوی نے کہا ہے کہ منشیات کا استعمال صرف افراد کو ہی نہیں خاندان کو بھی تباہ کر دیتا ہے۔

کراچی میں صدر پاکستان ڈاکٹر عارف علوی نے منشیات نذر آتش کرنے کی تقریب سے خطاب کیا۔

تقریب سے خطاب میں صدر مملکت کا کہنا تھا کہ منشیات کی نئی اقسام نوجوان نسل کو تیزی سے اپنے شکنجے میں جکڑ رہی ہیں، والدین کو اپنے بچوں پر خصوصی نگاہ رکھنے کی ضرورت ہے کیونکہ جو معاشرے اپنی اخلاقی اقدار کی بنیاد پیسے پر رکھتے ہیں وہ تباہ ہو جاتے ہیں

صدر ڈاکٹر عارف علوی نے منشیات کی روک تھام سمیت مختلف معاشرتی مسائل کے حوالے سے مناسب آگاہی پیدا کرنے کی ضرورت پر زور دیا ہے۔

انہوں نے کہا کہ منشیات پر قابو پانے کیلئے اس کی سپلائی کو روکنا ضروری ہے اور انسداد منشیات کیلئے ہر سطح پر کوششیں  کرنا ہوں گی، یاد رہے کہ امریکا انسداد منشیات مہم پر اربوں ڈالر خرچ کرتا ہے۔

ڈاکٹر عارف علوی نے بتایا کہ دنیا میں 90 فیصد منشیات افغانستان میں پیدا ہو رہی ہے جبکہ  افغانستان میں 10ہزار ٹن سالانہ افیون کی پیداوار ہو رہی ہے۔

کراچی میں منشیات فروش حسیناؤں کا نیٹ ورک بے نقاب

انہوں نے کہا کہ امن و امان کی خراب صورتحال کے دوران کراچی میں منشیات کا کاروبار بڑھا ہے، منشیات سے بچنے کیلئے نوجوان نسل کو صحت مند سرگرمیوں کی طرف مائل کرنا ہوگا۔

یاد رہے کہ گزشتہ ماہ وفاقی وزیر نارکو ٹکس شہر یار آفریدی کا کہنا تھا کہ حکومت نئی نسل کو منشیات سے بچانے کے لیے جہاد کر رہی ہے، ڈرگ رپورٹس کو خفیہ رکھنے کا مقصد نوجوانوں کو نشے کی لت سے بچانا ہے۔

شہریار آفریدی کا کہنا تھا کہ طالب علم اپنے ساتھیوں کو منشیات کے استعمال سے بچائیں، طالب علموں کے ڈرگ ٹیسٹ اور ان کے علاج کا پلان بنایا، چرس، کوکین ، شیشہ یہ فیشن نہیں ذلت ورسوائی کے گڑھے ہیں۔

کراچی میں صدرِ پاکستان ڈاکٹر عارف علوی سے گورنر سندھ عمران اسماعیل نے ملاقات کی۔ ملاقات میں انسداد منشیات پر آگاہی مہم، تعلیمی اداروں سے خاتمے کے لیے اقدامات پر تبادلہ خیال کیا گیا۔

ملاقات میں نوجوان نسل کو منشیات سے محفوظ رکھنے کے لیے کیے گئے اقدامات پر گفتگو کے ساتھ انسداد منشیات کے لیے ہر ممکن وسائل بروئے کار لانے کے عزم کا اظہار بھی کیا گیا۔

گورنر سندھ عمران اسماعیل نے صدر مملکت ڈاکٹر عارف علوی کو سی پی ایل سی میں انسداد منشیات سیل سے آگاہ کیا انہوں نے بتایا کہ اے این ایف، پولیس، سی پی ایل سی کے تعاون سے آگاہی مہم جاری ہے۔