مقبوضہ کشمیر پر پروگرام کرنے کی بناء پر فیسبک انتظامیہ نے ریڈیو پاکستان کی براہ راست نشریات پر پابندی عائد کر دی۔

تفصیلات کے مطابق فیسبک انتظامیہ کی جانب سے مقبوضہ کشمیر میں بھارتی فوج کی جانب سے انسانی حقوق کی خلاف ورزیوں کو اجاگر کرنے پر ریڈیو پاکستان کے خبروں کے بلیٹن کی براہ راست سٹریمنگ دو ماہ کیلئے بند کردی گئی ہے۔

ریڈیو پاکستان نے اپنی خبروں کی براہ راست ویڈیو سٹریمنگ جاری رکھنے کیلئے یوٹیوب آفیشل پر متبادل انتظامات کئے ہیں۔

فیسبک نے دو الرٹ نوٹسوں کے ذریعے کہا ہے کہ ریڈیو پاکستان کی دو پوسٹیں فیس بک کمیونٹی سٹینڈرڈز کے خلاف ہیں۔

اطلاعات ونشریات کے بارے میں معاون خصوصی ڈاکٹر فردوس عاشق اعوان نے مقبوضہ کشمیر میں بھارتی مظالم کو اجاگر کرنے پر فیسبک کی جانب سے ریڈیو پاکستان کی خبروں کی لائیو سٹریمنگ بند کئے جانے کو بنیادی  انسانی حقوق کی خلاف ورزی قرار دیا ہے۔

فیس بک نے  صارفین پر نظر رکھنے کا اعتراف کر لیا

 معاون خصوصی نے کہا کہ حکومت فیس بک پرریڈیو پاکستان کی خبروں کی لائیو سٹریمنگ کی بحالی کےلئےبھرپور کوششیں کرے گی۔

اطلاعات کی معاو ن خصوصی نے کہا کہ ہٹ دھرم بھارت جارحانہ اقدامات کے ذریعے خطے کے امن کو تباہ کرنے پر تلا ہوا ہے۔

معاون خصوصی نے کہا کہ بھارت مقبوضہ کشمیر میں بنیادی انسانی حقوق کا استحصال کررہا ہے جہاں بے گناہ کشمیریوں کو ان کے مذہبی سیاسی اور آئینی حقوق سے محروم رکھا جارہا ہے۔

 انہوں نے کہا کہ قائد اعظم محمد علی جناح نے ہندو بنیاد پرست سوچ کو بھانپ لیا تھا اور آج بھارت میں جو کچھ بھی ہورہا ہے وہ دو قومی نظریے کی توثیق ہے۔

 وہ اسلام آباد میں قائد اعظم محمد علی جناح کی سالگرہ کے حوالے سے تصویری نمائش کے افتتاح کے بعد صحافیوں سے  گفتگو کررہی تھیں۔