وزیراعظم عمران خان نے کہا کہ عالمی برادری مقبوضہ کشمیر کے غیر قانونی الحاق اور بھارتی فورسز کے قبضہ پر کاروائی کرے۔

تفصیلات کے مطابق وزیراعظم عمران خان سے برطانوی انسانی حقوق کے وکیل اور امریکی بین الاقوامی قوانین ماہر کی ملاقات ہوئی، ملا قات میں معاون خصوصی بیرسٹر شہزاد اکبر بھی شریک ہوئے۔

ملاقات میں وزیراعظم نے مظلوم مقبوضہ کشمیری عوام پر مظالم کو اجاگر کیا جبکہ مقبوضہ کشمیر میں میں انسانی حقوق کی سنگین خلاف ورزیوں پر  بھی غور کیا۔

اس موقع پر وزیراعظم عمران خان کا کہنا تھا کہ مقبوضہ کشمیر میں مسلسل انسانی حقوق کی خلاف ورزیاں عالمی برادری کےضمیر کا ٹیسٹ ہے۔

وزیراعظم عمران خان کا مزید کہنا تھا کہ اقوام متحدہ کے چارٹر اور سلامتی کونسل کی قراردادوں کے مطابق مقبوضہ کشمیری عوام کی حق خود ارادیت کی حمایت جاری رہے گی جبکہ کشمیری عوام کی خواہشات کے مطابق مسئلہ کشمیر حل ہونے تک پاکستان بھی کشمیریوں کی حمایت جاری رکھے گا۔

واضح رہے کہ گزشتہ روز وزیراعظم عمران خان سے ایشین ڈویلپمنٹ بینک کے چیف برائے فوڈ سیکیورٹی نے بھی ملاقات کی تھی۔

ملاقات میں وزیراعظم بریفنگ دیتے ہوئے کہا گیا تھا کہ جدید ٹیکنالوجی پر مبنی زراعت کا شعبہ حکومتی سرپرستی کا متقاضی ہے، زرعی شعبے کے فروغ کے لیے ریسرچ اینڈ ڈویلپمنٹ سینٹرکا قیام ضروری ہے۔

بریفنگ میں یہ بھی کہا گیا تھا کہ بیج کی جدید اقسام، کیمیکلز، فرٹیلائزرز، کیڑے مار دوائیں، مالی وسائل کی دستیابی ضروری ہے، بنگلادیش، نیپال، پاکستان میں زرعی انفرااسٹرکچر تباہ حالی کا شکار ہے۔

اس موقع پر وزیراعظم عمران خان نے یہ بھی کہا تھا کہ ہے کہ زرعی شعبے کی ترقی اور جدید ٹیکنالوجی کو متعارف کرانا حکومتی ترجیح ہے، کسانوں کو ہرممکنہ سہولت فراہم کرنا چاہتے ہیں۔

عمران خان نے مزید کہا تھا کہ زرعی شعبہ ملکی معیشت میں ریڑھ کی ہڈی کی حیثیت رکھتا ہے، ملکی آبادی کا بڑاحصہ زرعی شعبے سے منسلک ہے، زرعی اجناس کی پیداوار کے بارےمیں جامع منصوبہ بندی کی جا رہی ہے۔