پاکستان اور افغانستان کے درمیان تعلقات میں بہتری آگئی ، پشاور میں افغان قونصلیٹ کھول دیا گیا۔

تفصیلات کے مطابق افغان دارالحکومت کابل میں پاکستانی سفارتخانے میں 55 روز بعد قونصلر سروسز بحال ہوچکے اور ویزا کا اجرا بھی شروع کردیا گیا ہے  جبکہ پشاورمیں افغان قونصلیٹ کھول دیا گیا۔

ذرائع کے مطابق افغان حکام نے پاکستانی سفارتکاروں کو ہراساں کرنے کے واقعات پر قابو پانے کی یقین دہانی کرائی جس کے نتیجہ میں پاکستان اور افغانستان نے 2 ماہ کے سفارتی تعلقات کے تعطل کے بعد دوبارہ ویزا سروس شروع کرنے کا اعلان کیا۔-

ذرائع کا یہ بھی کہنا تھا کہ پاکستانی سفارتخانہ روزانہ افغان شہریوں کو بغیر فیس کے 3 ہزار ویزے جاری کرتا ہےجبکہ  ویزا اجراء کے دوبارہ آغاز سے دونوں ممالک بالخصوص عام افغان شہریوں کی مشکلات میں کمی آئے گی ۔

پاکستان نےافغان انتخاب میں کوئی مداخلت نہیں کی

یاد رہے کہ پاکستان نے کابل میں اپنے سفارتکاروں، عملے کی ہراسگی پر 3 نومبر کو سفارت خانے کے قونصلر سیکشن بند کر دیا تھا جبکہ سفارتی مشن نے غیر معینہ مدت تک ویزہ اجراء بند رکھنے کا اعلان کر دیا تھا اور دفتر خارجہ نے کابل میں سفارتکاروں کی حفاظت پر سنگین تحفظات ظاہر کرنے کے لئے افغان ناظم الامور کو طلب بھی کیا تھا۔

پاکستانی حکام کی طرف سے اس ضمن میں ذرائع ابلاغ کو ایک وڈیو کلپ بھی جاری کی گئی تھی جس میں افغان حکام پاکستانی ڈپٹی ہیڈ آف دی مشن حسن وزیر اور ایک اور سفارت کار کی گاڑی کو روکتے ہوئے نظر آتے ہیں۔