سانحہ آرمی پبلک اسکول (اے پی ایس) کی پانچویں برسی کےموقع پروزیراعظم عمران خان نے پیغام دیتے ہوئےکہاکہ آج ہم پشاورواقعے میں نشانہ بننے والوں کو یاد کر رہے ہیں، معصوم بچوں کے خون نے پوری قوم کو متحد کیااورقوم کو ہر قسم کی شدت پسندی، دہشتگردی، نفرت کے خلاف متحد کیا۔

 وزیراعظم عمران خان کاکہناتھا کہ سانحہ اے پی ایس کی پانچویں برسی کے موقع پرہم زندہ بچ جانے والوں کی صحتیابی کے لیے بھی دعاگو ہیں، ہم عہد کرتے ہیں کسی شدت پسند کے متعصب ذہن کو قوم پر مسلط ہونے نہیں دیں گے۔

انہوں نےکہاکہ آج ہم ننھے شہدا کو خراج عقیدت پیش کر رہے ہیں، ہمیں اپنی فورسز کی قربانیوں کو بھی خراج تحسین پیش کرنا چاہئے۔

سانحہ اے پی ایس  کی برسی کے موقع پرآرمی چیف جنرل قمر جاوید باجوہ نےبھی کہا ہے کہ سانحے کو بھلایا نہیں جاسکتا، واقعے میں ملوث 5 دہشتگردوں کو پھانسی دی گئی۔

آرمی چیف نے سوشل میڈیا پر جاری کیے گئے اپنے پیغام میں کہا کہ شہدا اور ان کے اہل خانہ کو سلام پیش کرتے ہیں، قوم نے دہشتگردی کو شکست دینے کیلئے لمبا سفر طے کیا، پاکستان کی امن و سلامتی کیلئے متحد ہو کر آگے بڑھیں گے۔

“APS carnage will never be forgotten. Five of the involved terrorists have been hanged through military courts. Salute to martyrs and their families. We have come a long way in failing terrorism as a nation. United we move towards lasting peace and prosperity of Pakistan”, COAS. pic.twitter.com/Swv1ocF3gO

— DG ISPR (@OfficialDGISPR) December 16, 2019

دہشت گردی کے ناسور کو ختم کیا، ہم بحیثیت قوم دہشت گردی کو شکست دیں گے۔

واضح رہے کہ سانحہ آرمی پبلک سکول کے شہدا کی پانچویں برسی آج منائی جا رہی ہے ۔

سانحے میں شہید ہونے والے اپنے پیاروں کی یاد میں والدین اور پوری قوم کی آنکھیں آج بھی پرنم ہیں،اس دن کی مناسبت سے ملک بھر میں خصوصی دعائیہ تقریبات کاانعقاد کیاگیاہے ، شہدا کی روح کو ایصال ثواب کے لئے فاتحہ اور قرآن خوانی کا اہتمام بھی کیاگیاہے۔

16دسمبر 2014ء کا دن، تاریخ میں سیاہ ترین دن کے نام سے یاد کیا جاتا ہے۔

اس دن سفاک دہشت گردوں نے پشاور کے آرمی پبلک اسکول میں وحشت اور بربریت کی انتہا کر دی اور 149 گھروں میں صف ماتم بچھا دی گئی۔

سانحہ اے پی ایس نے ملک سمیت دنیا بھر کے کروڑوں انسانوں کی آنکھوں کو نم کر دیا، پانچ سال پورے ہونے کے بعد آج بھی بچھڑنے والوں کا غم اسی طرح تروتازہ ہے۔