اقتصادی امور کے وزیر حماداظہر نے کہا ہے کہ حکومت کا اقتصادی اصلاحات کا ایجنڈا درست سمت میں آگے بڑھ رہا ہے اور اس کے ثمرات حاصل ہونا شروع ہو گئے ہیں۔

تفصیلات کے مطابق  اقتصادی امور کے وزی حماد اظہر نے اپنے ایک بیان میں کہا کہ گزشتہ پندرہ ماہ کے دوران پاکستان تحریک انصاف کی حکومت کی کوششوں کے نتیجے میں موڈیز نے پاکستان کی درجہ بندی کو منفی سے مستحکم قرار دیا ہے۔

حماداظہر  نے   یہ بھی کہا کہ عالمی مالیاتی فنڈ کے بورڈ کا جائزہ حکومت کی اقتصادی اصلاحات کی کامیابی کا اظہار ہے اور پالیسیوں کا تسلسل معیشت کی مکمل بحالی اور ترقی کے لئے ناگزیر ہے۔

جرمنی پاکستان کو 12.5 ملین یورو کی مالی اعانت فراہم کرے گا، حماد اظہر

اقتصادی امور کے وزیر حماداظہر نے مزید  کہا کہ آئی ایم ایف کے ایگزیکٹو بورڈ نے تسلیم کیا ہے کہ وزیراعظم کی قیادت میں حکومت کی بھرپور کوششوں سے معیشت درست سمت پر گامزن ہو گئی ہے۔

واضح رہے کہ اس سے قبل  وفاقی وزیر اقتصادی امور حماد اظہر نے گرانٹ کے لئے جرمن حکومت کے شکریہ ادا کرتے ہوئے کہا  تھا کہ یہ پراجیکٹ گرین انرجی فراہم کرے گا اور اس معاہدے کے تحت ہنزہ اور نانگا پربت جیسے علاقوں میں معیار زندگی بلند ہوگا۔

وفاقی وزیر حماد اظہر نے کہا  تھا کہ گلگت بلتستان میں بجلی کی شدید ضروریات پوری کرنے میں بھی مدد ملے گی جس پر جرمن ڈیویلپمنٹ بینک کے ایف ڈبلیو کے کنٹری ڈائریکٹر ولف گینگ مولرز نے اظہار خیال کرتے ہوئے کہا  تھا کہ جرمن ڈیولپمنٹ بینک گلگت جیسے خوبصورت علاقے میں بجلی کی فراہمی کے پراجیکٹ میں اپنا کردار ادا کرنے پر خوشی کا اظہار کرتا ہے۔

جرمن ڈیویلپمنٹ بینک کے ایف ڈبلیو کے کنٹری ڈائریکٹر ولف گینگ مولرز  نے مزید کہا تھا کہ پاکستان کے شمالی علاقہ جات کو ترقی کی ضرورت ہے، ان علاقوں میں بجلی کے آنے سے کاروبار سیاحت اور تعلیم کے مواقع پیدا ہوں گے۔