وزیرخارجہ شاہ محمود قریشی نے کہا ہے کہ پاکستانی معیشت مستحکم ہو رہی ہے اور پاکستان کے پاس 21ویں صدی میں کامیابی کیلئے تمام وسائل موجود ہیں۔

تفصیلا کے مطابق نیروبی میں پاکستان افریقہ تجارتی ترقیاتی کانفرنس کے افتتاحی اجلاس سے خطاب کرتے ہوئے انہوں نے کہا کہ ہم نے انسداد دہشت گردی کے لئے جامع اقدامات کئے ہیں اور تبدیلی پر مبنی ڈھانچہ جاتی اصلاحات چیلنجز کو مواقع میں تبدیل کر رہی ہیں۔

وزیر خارجہ نے کہا کہ پاکستان 92 معدنیات سے مالا مال ملک ہے اور ان میں سے 52 سے تجارتی طورپر استفادہ کیا جا رہا ہے۔

شاہ محمود قریشی نے یہ بھی کہا کہ میں صدر کنیاتا کا شکریہ ادا کرتا ہوں کہ وہ آج یہاں ہم میں موجود ہیں اور انہوں نے تقریب کو رونق بخشی، پاکستان اور افریقہ میں تجارتی ترقی کے فروغ کی اس پہلی کانفرنس کے افتتاحی اجلاس میں شریک ہوئے۔

وزیر خارجہ کا کہنا تھا کہ ہم کینیا کے کیبنٹ سیکریٹریز برائے خارجہ امور اور تجارت، صنعت وکوآپریٹوز کا بھی شکریہ ادا کرتے ہیں کہ انہوں نے اس ہمہ جہت شہر نیروبی میں اس تقریب کے انعقاد کے لئے حکومت پاکستان کی بھرپور معاونت کی۔

شاہ محمود قریشی کینیا روانہ

وزیرخارجہ نے کہا کہ پاکستان اور کینیاءمیں دوستی اور قریبی تعاون کی مضبوط اور فعال تاریخ ہے جبکہ کینیا، افریقہ میں پاکستان کا سب سے بڑا تجارتی شراکت دار ہے، گذشتہ برس ہماری دو-طرفہ باہمی تجارت تقریباً ایک ارب ڈالر کی حد کو چھو چکی ہے۔

شاہ محمود قریشی نے یہ بھی کہا کہ پاکستان میں کینیا چائے اور کینیا میں پاکستان کے چاول کے صارفین کی قابل لحاظ تعداد اور شائق موجود ہیں، کینیا افریقہ کی سب سے اینٹر پرائزنگ قوم ہے،افریقہ تیزی سے ترقی کرتی معیشت کے ساتھ ساتھ ’سلیکون سوانا ‘ اور متنوع وسائل کی بنیاد ہے۔

شاہ محمود قریشی کا کہنا تھا کہ صدرکنیاتا ’بِگ 4 ایجنڈا‘ کے تحت تبدیلی لارہے ہیں تاکہ مینوفیکچرنگ ، فوڈ سکیورٹی، صحت عامہ میں اضافہ ہو اور عوام کو مناسب رہائشی سہولیات میسرآسکیں۔ یہ اقدامات ترقی وخوشحالی کی طرف کینیا کی ترقی کی راہ ہموار کررہے ہیں۔

شاہ محمود قریشی کا یہ بھی کہنا تھا کہ کینیا بڑے خواب دیکھنے اور کامیابیاں حاصل کرنے والوں کی جگہ ہے جو تعلیم اور صحت میں سرمایہ کاری کا مرہون منت ہے۔ اس کے نتیجے میں یہاں کی حقیقی صلاحیتیں تعبیر پارہی ہیں، اس میں کاروبار اور تخلیقات کے میدان میں دنیا کی قیادت کی صلاحیت موجود ہے۔

وزیر خارجہ شاہ محمود قریشی کا مزید کہنا تھا کہ مایکروکومسم ایک نئے افریقہ کے طلوع ہونے کی نمائندگی کررہا ہے لہذا میں ایک مرتبہ پھر آپ کا شکریہ ادا کرتا ہوں کہ یہ موقع ہمیں فراہم کیا اور ہمارے درمیان استوار تاریخی روابط کو ایک مرتبہ پھر دوہرانے کا موقع فراہم کیا اور اس کے نتیجے میں ہمیں ترقی اور خوشحالی کے یکساں فوائد سے ہمکنار ہونے کا موقع ملا ہے۔