وفاقی حکومت نے  کراچی پیکیج کے تحت ترقیاتی منصوبوں کی جلد تکمیل کا اعلان کر دیا ہے ۔

تفصیلات کے مطابق وفاقی وزیر اسد عمر سے خالد مقبول صدیقی کی سربراہی میں ایم کیو ایم کے وفد نے ملاقات کی، جس میں کراچی اور حیدر آباد کے دیگر ترقیاتی منصوبوں پر بھی تفصیلی بات چیت کی گئی۔

اس موقع پر وفاقی وزیر اسد عمر نے کہا کہ کراچی پیکج کے تحت ترقیاتی منصوبوں پر کام کی رفتار تیز کی گئی ہے جبکہ حکومت کراچی ترقیاتی منصوبوں کے لیے اپنے حصے کے فنڈز فراہم کر رہی ہے۔

وفاقی وزیر برائے منصوبہ بندی نے کہا کہ وزیراعظم پانی کی فراہمی کے لیے کے4 منصوبوں کی تکمیل کے خواہاں ہیں جبکہ کے فور منصوبے کی پراگریس سے متعلق سندھ حکومت سے رابطے میں ہیں۔

وفاقی وزیر برائے منصوبہ بندی ، ترقی و اصلاحات اور خصوصی اقدامات اسد عمر نے یہ بھی کہا  کہ کراچی سرکلر ریل سے متعلق تصفیہ طلب امور حل کیے جائیں گے، ناردرن بائی پاس اور ریلوے فریٹ کاریڈور منصوبے بھی ترجیح ہیں جبکہ پیکج کے ترقیاتی منصوبوں پر کام سے درپیش مشکلات کا بھی ازالہ کیا جائے گا۔

حکومت آزادکشمیر کے ترقیاتی منصوبوں میں مدد کرتی رہے گی، اسد عمر 

ملاقات میں وفاقی وزیر خالد مقبول صدیقی کی سربراہی میں ایم کیو ایم کے وفد نے ترقیاتی منصوبوں کے لیے وفاقی حکومت کے تعاون پر اظہار تشکر کیا۔

اس سے قبل وفاقی وزیر برائے منصوبہ بندی ترقی و اصلاحات اسد عمر کی وزیراعظم آزاد جموں و کشمیر راجہ فاروق حیدر کے ساتھ ملاقات ہوئی تھی۔

اس موقع پر وزیر اعظم آزاد جموں وکشمیر راجہ فاروق حیدر نے  آزاد جموں وکشمیر کی ترقی کے لئے وفاقی حکومت کی طرف سے دیئے گئے تعاون کی تعریف کی اور ان کا شکریہ ادا کیا  جبکہ اسد عمر نے آزاد جموں و کشمیر کی ترقی کے لئے آزاد جموں کشمیر کے وزیر اعظم کو اپنے مکمل تعاون کی یقین دہانی کرائی۔

ملاقا ت میں وفاقی وزیر برائے منصوبہ بندی اسد عمر نے کہا  تھا کہ وفاقی حکومت آزاد جموں وکشمیر کے ترقیاتی منصوبوں کو مکمل کرانے میں مکمل مدد فراہم کر رہا ہے جبکہ پبلک سیکٹر ڈویلپمنٹ پروگرام (پی ایس ڈی پی) کے تحت جاری منصوبوں پر کام کی رفتار کو بھی تیز کیا جارہا ہے۔