جمعیت علماء اسلام کے سر براہ مولانا فضل الرحمن نے کہا ہے کہ حکومت عوام کو ریلیف دینے مکمل طور پر ناکام ثابت ہوئی ہے اور   نااہل حکمران ملک میں بحران لانے کیلئے آئے ہیں۔

تفصیلات کے مطابق جمعیت علماء اسلام کے سر براہ مولانا فضل الرحمن نے  گندم اور آٹے کی قیمتوں میں اضافے اور بحران کی شدیدالفاظ میں مذمت کرتے ہوئے کہا کہ نام نہاد حکومت سکرین سے آوٹ ہے اور آٹے کا بحران تو جعلہ حکومت کی بدترین ناکامی ہے۔

اپنے بیان میں جمعیت علماء اسلام کے سر براہ نے کہا کہ قوم کو بتا یا جا ئے اصل حقائق کیا ہیں جبکہ آٹا بحران کے ساتھ ساتھ گیس بحران نے قوم کو نام نہاد حکومت کی اصلیت دکھا دی ہے۔

مولانا فضل الرحمن  کا کہنا تھا کہ ریاست مدینہ کے دعویدار حکمرانوں کی ناکام پالیسیوں نے غریب عوام کو خودکشی پر مجبور کر دیاہے۔ آٹا اور روٹی کی قیمتوں اضافہ عوام کے منہ سے روٹی کانوالہ چھیننے کے مترادف ہے۔

ملک بھرمیں آٹےکاشدید بحران ،زمہ دارکون ؟

جمعیت علماء اسلام کے سر براہ کا یہ بھی کہنا تھا کہ پاکستان ایک زرعی ملک ہے اناج اور گیس پاکستان کی پیدوار ہیں اور ایسی اشیا  ضروریہ کا بحران پیدا ہو جا نا ظاہر کرتا ہے کہ یہ مصنوعی بحران ہے لیکن ان بحرانی حالا ت میں کو ئی ذمے دار سامنے نہیں آرہا ہے۔

 مولانا فضل الرحمن نے حکومت پر تنقید کرتے ہوئے کہا کہ بجلی ،گیس کی قیمتوں میں اضافے کے بعد آٹے کے بحران نے غریب عوام کا جینا مشکل بنا دیا ہے ۔

جمعیت علماء اسلام کے سر براہ مولانا فضل الرحمن نے مزید کہا کہ مہنگائی نے عوام کو نفسیا تی مریض بنا دیا ہے جبکہ حکومت مہنگائی کے جن کو بوتل میں بند کر نے اورآٹے کے مصنوعی بحران کو ختم کرنے میں ناکام ہوگئی ہے۔

یاد رہے کہ ملک بھرمیں جاری آٹےکابحران شدت اختیارکرنےلگاہےتاہم انتظامیہ حل نکالنےکے بجائےایک دوسرے پر الزامات  ڈالنےمیں مصروف ہیں۔