وزیر خارجہ مخدوم شاہ محمود قریشی دوسرے مرحلے میں، سعودی عرب کا ایک روزہ دورہ مکمل کر کے عمان روانہ ہوگئے ہیں۔

تفصیلات کے مطابق وزیر خارجہ مخدوم شاہ محمود قریشی کو کنگ خالد انٹرنیشنل ائیرپورٹ پر سعودی وزارت خارجہ کے ڈی جی پروٹوکول عبداللہ ایم راشد، سعودی عرب میں پاکستان کے سفیر راجہ علی اعجاز اور پاکستانی سفارت خانے کے سنیر حکام نے الوداع کیا۔

ذرائع کے مطابق وزیر خارجہ مخدوم شاہ محمود قریشی اپنے  دورہ ء عمان کے دوران، سلطنت عمان کے سابق فرمانروا سلطان قابوس بن سعید کے انتقال پر شاہی خاندان سے اظہار تعزیت کریں گے۔

واضح رہے اس سے قبل وزیر خارجہ مخدوم شاہ محمود قریشی کی  سعودی عرب کے دارالحکومت  ریاض میں سعودی ہم منصب شہزادہ فیصل بن فرحان السعود سے  ملاقات ہوئی تھی ۔

سعودی دفترخارجہ  پہنچنے  پر سعودی وزیر خارجہ شہزادہ فیصل بن فرحان السعود نے وزیر خارجہ مخدوم شاہ محمود قریشی کا پرتپاک خیرمقدم کیا ، دوران ملاقات ،مشرق وسطیٰ میں پائی جانے والی  کشیدگی اور خطے میں امن و امان کی  صورتحال سمیت باہمی دلچسپی کے اہم علاقائی و عالمی امور پر تفصیلی تبادلہ ء خیال کیا گیا تھا ۔

وزیر خارجہ شاہ محمود قریشی کی سعودی ہم منصب سے ملاقات

سعودی وزیر خارجہ نے مشرق وسطیٰ میں پائی جانے والی بحرانی کیفیت پر قابو پانے اور خطے کو مزید کشیدگی سے بچانے ،کیلئے وزیر اعظم عمران خان کی “امن کاوشوں” کو سراہا اور وزیر خارجہ مخدوم شاہ محمود قریشی کے دورے اور کوششوں کا خیر مقدم کیا تھا۔

ملاقات میں وزیر خارجہ نے کہا تھا کہ خطے میں پائی جانے والی کشیدگی باعث تشویش ہے، اس کشیدہ صورتحال کو اعتدال پر لانے اور خطے کے امن و استحکام کو تحفظ فراہم کرنے کیلئے ضروری ہے کہ معاملات کو سفارتی ذرائع بروئے کار لا کر، پر امن طریقے سے حل کرنے پر زور دیا جائے۔

شاہ محمود قریشی  نے یہ بھی کہا تھا کہ پاکستان کی کوشش یہی ہے کہ تمام فریقین کو ،صبر و تحمل کا مظاہرہ کرنے اور تنازعات کے حل کیلئے مذاکرات اور گفت و شنید  کا راستہ اپنانے پر آمادہ کیا جائے جبکہ ہمیں تشویش ہے کہ اگر اس آگ کو ٹھنڈا کرنے کیلئے، بروقت اقدام نہ اٹھائے گئے تو یہ پورے خطے کو اپنی لپیٹ میں لے سکتی ہے۔