وزیرخارجہ  شاہ محمود قریشی نے کہا ہے کہ بی جے پی کے ہندوبالادستی کے نظریئے نے بھارتی مسلمانوں کو ان کے آئینی اور قانونی حقوق سے محروم کر دیاہے۔

تفصیلات کے مطابق ملتان میں وزیر خارجہ شاہ محمود قریشی نے حضرت شاہ رکن عالم کے عرس کی اختتامی تقریب سے خطاب کرتے ہوئے بھارتی مسلمانوں کو عرس میں شرکت کے لئے ویزا جاری نہ کرنے پر بھارت کی مذمت کی۔

وزیر خارجہ نے کہا کہ بھارتی حکومت کی پالیسیوں کی وجہ سے پاکستان سمیت پورا خطہ مشکلات کا سامنا کررہا ہے۔

شاہ محمود قریشی نے  یہ بھی کہا کہ مقبوضہ کشمیر کے لوگ اپنی زندگیوں کے بدترین دور سے گزر رہے ہیں کیونکہ وہ اپنے گھروں میں محفوظ نہیں ہیں۔

مشرق وسطیٰ کی صورتحال کے بارے میں وزیر خارجہ شاہ محمود قریشی نے  مزید کہا کہ خطے میں بہت سے مسائل اُبھررہے ہیں جن سے پاکستان بھی متاثر ہو رہا ہے۔

پاکستان دنیا بھر کے مظلوم عوام کے حقوق کے لیے آواز اٹھاتا رہے گا، وزیرخارجہ

واضح رہے اس سے قبل ملتان میں عالمی تنظیم العارفین کے زیر اہتمام قاسم باغ سٹیڈیم میں سالانہ میلاد مصطفی ﷺو حق باہو کانفرنس سے وزیر خارجہ مخدوم شاہ محمود قریشی نے خطاب کرتے ہوئے کہا تھا کہ پیغمبر اسلامﷺ کی آفاقی تعلیمات پر عمل کرتے ہوئے اسلام کے مثبت انداز ِ فکر کو اجاگر کرنا ‘ دور حاضر کا بنیادی تقاضا ہے۔

وزیرخارجہ مخدوم شاہ محمود قریشی  نے یہ بھی کہا تھا کہ پاکستان دنیا کے مظلوم عوام کو حقوق دلانے کے لئے اپنی آواز اٹھاتا رہے گا ۔

تقریب سے خطاب کرتے ہوئے  شاہ محمود قریشی کا کہنا تھا کہ اس وقت مختلف اطراف سے اسلام کے خلاف سازشیں کی جارہی ہیں، منظم منصوبے کے تحت دہشت گردی کو مسلمانو ں کے ساتھ جوڑا جارہا ہے۔

وزیرخارجہ کا مزید کہنا تھا کہ ہندوستان کا حالیہ سٹیزن ترمیمی ایکٹ مسلمانوں کے خلاف تعصب اور نفرت کی بدترین مثال ہے جبکہ ایکٹ کو ہندوستان کی 11ریاستوں نے تسلیم کرنے سے انکار کردیا،عوام سراپا احتجاج ہیں۔