مشیر خزانہ عبدالحفیظ شیخ نے کہا ہے کہ حکومت ملک میں برآمدات پر مبنی ترقی کے لئے کوشاں ہے۔

تفصیلات کے مطابق پاکستان میں برطانوی ہائی کمشنر ڈاکٹر کرسچین ٹرنر سے مشیر خزانہ عبدالحفیظ شیخ کی اسلام آباد میں ملاقات ہوئی۔

 ملاقات میں عبد الحفیظ شیخ نے برطانوی حکومت کی طرف سے پاکستان کے لئے سفری ہدایات میں تبدیلی کے فیصلے کو سراہا جبکہ پاکستان کی برآمدات کے حوالے سے بھی بات چیت کی جس میں بہتری کا رجحان ظاہر ہونا شروع ہوگیا ہے۔

اس موقع پر مشیر خزانہ نے کہا کہ پاکستان تحریک انصاف کی حکومت مارکیٹ میں بے جا مداخلت میں کمی اور نجکاری کے عمل کے فروغ سے طویل المیعاد اقتصادی اصلاحات کے ایجنڈے پر عمل پیرا ہے۔

مشیر خزانہ عبدالحفیظ شیخ نے کہا کہ محصولات کی وصولی میں تقریباً16 فیصد اضافہ ہوا ہے جبکہ براہ راست غیر ملکی سرمایہ کاری اور شعبہ جاتی سرمایہ کاری میں بھی کئی گنا اضافہ ہواہے۔

برطانیہ کے ہائی کمشنرکی وزیراعظم کے مشیرسےملاقات

برطانوی ہائی کمشنر ڈاکٹر کرسچین ٹرنرنے کہا کہ ان کا ملک پاکستان میں جاری اقتصادی اصلاحات کی حمایت کرتا ہے اور مستقبل میں تعاون کے لئے معیشت کو اہم شعبہ تصور کرتا ہے۔

واضح رہے گزشتہ روز برطانیہ کے ہائی کمشنر ڈاکٹر کرسچین ٹرنر نے موسمیاتی تبدیلی سے متعلق وزیراعظم کے مشیر ملک امین اسلم سے اسلام آباد میں ملاقات کی تھی۔

ق برطانیہ کے ہائی کمشنر نےملاقات میں حکومت کے سرسبزاورصاف پاکستان پروگراموں میں موسمیاتی تبدیلی کی وزارت کے ساتھ مل کر کام کرنے میں دلچسپی ظاہر کی تھی۔

اس موقع پربرطانوی ہائی کمشنر نے گرین فنانشل سسٹمز، سرسبزاورصاف ستھرے ماحول کا فروغ،مسائل کے فطری حل اور ماحولیاتی تغیر سے نمٹنے کے لئے پاکستان کے اقدامات سمیت موسمیاتی تبدیلی کے چار شعبوں پر بھی گفتگو کی تھی ۔

وزیراعظم کے مشیر ملک امین اسلم نے برطانوی ہائی کمشنر کو موسمیاتی تبدیلی کے اثرات کم کرنے کے حوالے سے حکومت کے پانچ اہم اقدامات کے بارے میں بتایا۔