وزیرِ اعظم عمران خان کی معاونِ خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ سندھ حکومت کی کوتاہی کے باعث آٹے کے ذخیرے میں کمی پیدا ہوئی جبکہ آٹے کی سپلائی اور قیمتوں سے متعلق میڈیا پر منفی پروپیگنڈا چل رہا ہے۔

تفصیلات کے مطابق وزیر اعظم عمران خان کی معاون خصوصی برائے اطلاعات و نشریات فردوس عاشق اعوان نے سیالکوٹ میں نیوز کانفرنس کرتے ہوئے کہا کہ آٹے کی سپلائی اور قیمتوں سے متعلق منفی پروپیگنڈے کی روک تھام ضروری ، جبکہ ملک بھر میں خوراک کی فراہمی وفاقی حکومت کا فرض ہے۔

 ڈاکٹر فردوس عاشق اعوان نے کہا کہ سندھ حکومت فلور ملز تک گندم پہنچانے میں ناکام رہی ہے، سندھ حکومت کو چاہیے گندم کی سپلائی کے عمل کو تیز کرے۔

وزیرِ اعظم عمران خان کی معاونِ خصوصی برائے اطلاعات و نشریات نے یہ بھی کہا کہ سندھ کو 4 لاکھ ٹن گندم فراہم کرنے کا فیصلہ کیا گیا تھا، جو اس اسٹاک سے ایک لاکھ ٹن گندم اٹھا چکا ہے، البتہ سندھ حکومت گندم کو آٹا ملز تک پہنچانے میں ناکام رہی ہے۔

فردوس عاشق اعوان کا کہنا تھا کہ ماضی میں حکومت نے الیکشن کے لیے اصل قیمتوں کو چھپایا جبکہ موجودہ حکومت نے جو چیز جس قیمت میں ہے اسی قیمت میں مارکیٹ میں پیش کی۔

ملک بھرمیں آٹےکاشدید بحران ،زمہ دارکون ؟

معاونِ خصوصی برائے اطلاعات و نشریات کا یہ بھی کہنا  تھا کہ کہ آٹے کے مصنوعی بحران پر ہیلپ لائن قائم کردی گئی ہے، 20 کلو کا تھیلا 805 روپے سے زائد فروخت پر ایکشن ہوگا۔

ڈاکٹر فردوس عاشق اعوان نے کہا کہ مہنگا بیچنے والوں کے خلاف ہیلپ لائن پر شکایت درج کروائی جاسکتی ہےجبکہ وزیر اعظم نے  بھی اپنے ایک بیان میں کہا ہے کہ ذخیرہ اندوزوں اور منافع خوروں کو نہیں چھوڑوں گا۔

فردوس عاشق اعوان نے یہ بھی کہا کہ واویلا کرنے والا سیاسی یتیموں کا ایک ٹولہ ملک میں تاثر دے رہا ہے کہ حکومت اپنی مدت پوری نہیں کرے گی لیکن حکومت اپنے اتحادیوں سے مل کر 5 سال پورے کرے گی۔

وزیرِ اعظم عمران خان کی معاونِ خصوصی برائے اطلاعات و نشریات ڈاکٹر فردوس عاشق اعوان  نے مزید کہا کہ اس وقت عوامی خوش حالی کے لیے اتحادی اور حکومت ایک پیج پر ہیں، ایم کیو ایم سمیت تمام اتحادیوں سے بات جاری ہے اور انشا اللہ اس حوالے سے جلد عوام کو خوش خبری دیں گے۔