کراچی کے علاقے کلفٹن کی ڈرائیونگ لائسنس برانچ کے قریب کچرا کنڈی سے تین گدھوں کے سر اور آلاشیں ملی ہیں۔

میونسپلٹی والے اٹھا لے گئے مگر لوگوں میں اس حوالے سے اضطراب پایا جا رہا ہے اور پولیس بھی اس بات کا کھوج لگانے میں لگی ہوئی ہے کہ آخر گدھوں کا گوشت گیا کہاں؟

علاقہ مکینوں کی جانب سے کچرا کنڈی میں گدھے کے سر اور آلائشوں کی موجودگی کی اطلاع ملنے پر کنٹونمنٹ بورڈ کلفٹن کی جانب سے کچرا اٹھانے والے عملے نے کچھ ہی دیر میں تمام آلائشیں اٹھا لیں مگر تب تک کچرا کنڈی کی تصاویر اور وڈیوز سوشل میڈیا پر چلنا شروع ہوگئیں  ۔

واقعے کی اطلاع ملنے پر پولیس بھی موقع پر پہنچ گئی اور ارد گرد لوگوں سے پوچھ تاچھ کی تاہم ابھی تک یہ پتہ نہیں چل سکا کہ گدھوں کو ذبح کس نے اور کہاں کیا تھا۔

دوسری جانب سوشل میڈیا پر اس حوالے سے نہایت معنی خیز بحث کا آغاز ہوگیا ہے جس میں کراچی والے گدھوں کے ذبح ہونے کا ملبہ لاہوریوں پر ڈال رہے ہیں، جبکہ لاہور والے کراچی کے لوگوں سے پوچھ رہے ہیں انہیں کھانوں میں لاہور کا ذائقہ کیسا لگ رہا ہے۔

یاد رہے کہ کچھ عرصہ قبل لاہور میں بڑی مقدار میں گدھے کی کھالیں ملنے اور پنجاب فوڈ اتھارٹی کی جانب سے ریستورانوں میں مضرِ صحت گوشت کی فروخت کے بعد اس بات کا خوب چرچا ہوا تھا کہ لاہور والوں کو مبینہ طور پر گدھے کا گوشت کھلایا جا رہا ہے۔

واضح رہے کلفٹن کے علاقے میں بوٹ بیسن اور ڈیفینس میں دو دریا کی مشہور فوڈ سٹریٹس اس جگہ سے محض چند کلومیٹر دور ہے جہاں سے گدھے کی آلائشیں ملیں، سو لوگ یہ باتیں بھی کر رہے ہیں کے وہ ان فوڈ سٹریٹس میں نہیں جائیں گے۔