وزیراعلیٰ سندھ مراد علی شاہ نے کہا ہے کہ چین پاکستان کا قریبی، دیرینہ اور بااعتماد دوست ہے۔

تفصیلات کے مطابق وزیراعلیٰ سندھ سید مراد علی شاہ سے چین کے نئے قونصل جنرل مسٹر لی بیجان کی ملاقات ہوئی۔

 اس موقع پر سید مراد علی شاہ نے نئے قونصل جنرل کو سندھ آنے میں خوش آمدید کیا جبکہ سی پیک کے پہلے اور دوسرے فیز کے منصوبوں پر تبادلہ خیال کیا گیا۔

ترجمان وزیراعلیٰ سندھ نے یہ بھی  کہا کہ ملاقات میں وزیراعلیٰ سندھ نے  آنے والے سفارتکار کو سندھی ٹوپی، اجرک اور مومنٹو پیش کیا اور ان کا خیرمقدم کرتے ہوئے کہا کہ سندھ کو آپ اپنا دوسرا گھر سمجھیں۔

وزیراعلیٰ سندھ نے کراچی میں چین کے نئے متعین قونصل جنرل سے کہا کہ وہ اپنی حکومت کے ساتھ سندھ حکومت کو صحرائی علاقوں میں اسپرے کے لیے جدید ائیر کرافٹس کی فراہمی میں تعاون کے لیے بات کریں۔

قونصل جنرل نے وزیراعلیٰ سندھ کو یقین دلایا کہ وہ اپنی حکومت سے اس حوالے سے بات کریں گے اور انہیں آئندہ 3 دن کے اندر جواب دیں گے۔

سی پیک کی تکمیل سے پورا خطہ مستفید ہوگا، وزیراعظم

مراد علی شاہ نے چین کی حکومت کا تھر میں کوئلے سے چلنے والے پاور پلانٹ کے قیام پر  شکریہ بھی ادا کیا اور کہا کہ چائنیز کمپنی تھر میں کوئلے کی کان کنی کے لیے کام کررہی ہے۔

وزیراعلیٰ سندھ مراد علی شاہ نے  مزید کہا کہ چین سے تعلقات ہمیں اس لئے زیادہ عزیز ہیں کہ اس کی بنیاد شہید ذوالفقار علی بھٹو نے رکھی جبکہ چین ہمارا سب سے زیادہ قابل اعتماد دوست ہے ۔

یاد رہے اس سے قبل پاکستان اور چین نے داخلی سیکورٹی کو موثر بنانے کے لئے سپیشل سیکورٹی ڈویژن بنانے کا فیصلہ کر لیا تھا۔

پاکستان نے سی پیک سیکورٹی اور داخلی صورت حال کو بہتر بنانے کے لئے پائلٹ پروجیکٹ شروع کرنے کا فیصلہ کر لیا تھا جبکہ اس سلسلے میں چین نے پاکستان کو ہر ممکن تعاون کی یقین دہائی کروا دی تھی۔

بول نیوز کو موصول ہونے والی دستاویزات میں دونوں ممالک کی جانب سے دہشت گردی کے خلاف مل کر جنگ جاری رکھنے کا عزم کا بھی اظہار کیا گیا تھا۔