ایس ایس جی سی کے سسٹم میں معمولی سی بہتری آنا شروع ہوگئی، ترجمان سوئی سدرن گیس کمپنی نے سی این جی ایسوسی ایشن کو فلنگ اسٹیشن کھولنے کی اجازت دے دی۔

تفصیلات کے مطابق سی این جی ایسوسی ایشن اور ایس ایس جی سی حکام کے درمیان گیس بندش کے حوالے سے ملاقات ہوئی۔

 ملاقات  میں موجودہ صورتحال اور شہریوں کو درپیش مسائل کے حوالے سے گفتگو کی گئی جبکہ ایس ایس جی سی حکام نے سی این جی ایسوسی ایشن کو 8 گھنٹے اسٹیشن کھولنے کی اجازت دی ۔

ترجمان ایس ایس جی سی کا کہنا تھا کہ سردی میں شدت کی سبب گھریلو اور کمرشل صارفین کو گیس پہنچانے میں مشکلات کا سامنا ہے۔

ترجمان ایس ایس جی سی کا یہ بھی کہنا تھا کہ فیصلے  کے تحت کراچی اور سندھ کے تمام سی این جی اسٹیشنز کل یعنی جمعرات کی شب 10 بجے سے  جمعے کی صبح 6 بجے تک تمام سی این جی اسٹیشنز کو گیس بحال کی جائیگی۔

شیڈول کے باوجود سی این جی اسٹیشن نہیں کھلے

ترجمان ایس ایس جی سی نے کہا کہ جمعے کو 6 بجے بند ہونے کے بعد سی این جی اتوار 5 جنوری یعنی بروزاتوارصبح 8 بجے سے رات 8 بجے تک 12 گھنٹے کے لئے تمام سی این جی اسٹیشنز کو گیس کی ترسیل بحال رکھی جائے گی۔

ترجمان سوئی سدرن گیس کمپنی نے مزیدکہا کہ پریشر کی صورتحال کو مد نظر رکھ کر آئندہ کا فیصلہ کیا جائے گا۔

 واضح رہے کہ شہر کراچی میں ہفتے بھر سے جاری سی این جی بندش جاری ہے جو کہ خاتمے کا نام نہیں لے رہی ہے۔

صارفین کہتے ہیں کہ گیس بندش سے معمولات زندگی تباہ ہوگئی ہے،  آنے جانے کا ارادہ کریں تو سی این جی کا خیال بڑھتے قدم روک دیتا ہے۔

ادھر دوسری طرف فیصل آباد،گوجرانوالہ ،ملتان، بہاولپور، جھنگ، سرگودھا سمیت پنجاب کے کئی اضلاع میں گھریلو صارفین گیس کی عدم فراہمی پر سخت پریشان ہیں۔

اطلاعات کے مطابق ان شہروں میں گھروں میں صبح ہوتے ہی گیس کی بندش سے معمولاتِ زندگی متاثر رہتے ہیں۔