وزیر اعظم عمران خان کی معاون خصوصی برائے اطلاعات و نشریات فردوس عاشق اعوان  نے کہا ہے کہ ہائوسنگ اتھارٹی بل کی منظوری کا مقصد غریب اور کم آمدنی والے ملازمین کو رہائش کی سہولیا ت فراہم کرناہے۔

تفصیلا ت کے مطابق  اسلام آباد میں سمارٹ ایکسپو آف فیوچرڈویلپمنٹ ہولڈنگز کے افتتاح کے بعد صحافیوں سے گفتگو کرتے ہوئے وزیر اعظم عمران خان کی معاون خصوصی برائے اطلاعات و نشریات فردوس عاشق اعوان  نے کہا کہ آئندہ دس سال کے دوران ملک میں ہائوسنگ کے شعبے میں دس ارب ڈالر کی سرمایہ کاری متوقع ہے۔

وزیر اعظم عمران خان کی معاون خصوصی برائے اطلاعات و نشریات نے کہا کہ حکومت قومی اداروں کے استحکام کیلئے پرعزم ہے اور عدالتی نظام میں خامیوں کے تدارک سمیت انصاف کی فراہمی کے نظام میں تبدیلیاں لانے کیلئے تمام ممکنہ کوششیں کی جارہی ہیں تاکہ معاشرے کے بااثر اور طاقتور عناصر ناجائز فائدہ نہ اٹھاسکیں۔

ایم کیو ایم پاکستان ہماری اتحادی ہے اور رہے گی، فردوس عاشق اعوان

فردوس عاشق اعوان  نے  یہ بھی کہا کہ پارلیمنٹ کے دونوں ایوانوں نے وفاقی حکومت کے سرکاری ملازمین کیلئے ہائوسنگ اتھارٹی بل کی منظوری دی ہے جس کا مقصد غریب اور کم آمدنی والے ملازمین کیلئے رہائش کی سہولت کی فراہمی کے حوالے سے وزیراعظم کے وژن کو عملی شکل دینا ہے۔

حاضرین سے خطاب کرتے ہوئے ڈاکٹر فردوس عاشق اعوان نے کہا کہ گلگت بلتستان پاکستان کا روشن چہرہ ہے اور سیاحت کے شعبے کے فروغ کے حوالے سے وزیراعظم کا بیانیہ گلگت بلتستان کو سیروسیاحت کے حوالے سے متعارف کرانے کی حکمت عملی سے منسلک ہے۔

فردوس عاشق اعوان کا کہنا تھا  کہ حکومت گلگت بلتستان میں سیروسیاحت کے دستیاب مواقع محفوظ بنانا چاہتی ہے تاکہ سیاحوں کی توجہ علاقے کی مسحور کن خوبصورتی کی جانب مبذول کرائی جاسکے۔

وزیر اعظم عمران خان کی معاون خصوصی برائے اطلاعات و نشریات فردوس عاشق اعوان  کا مزید کہنا تھا کہ گلگت بلتستان کے عوام پاکستان کی دفاعی ڈھال ہیں اور ملک کیلئے ان کی قربانیاں تاریخ میں سنہری الفاظ میں لکھی گئی ہیں۔